DILI, 09 Setembru 2024 (TATOLI) – Grupu kulturá husi munisípiu Ainaro, kompostu husi ema na’in-37 sei simu Papa Francisco ho Bidu Naroman.
Koordenador grupu kulturál husi postu administrativu Maubisse, munisípiu Ainaro, João da Costa Bossa, informa katak objetivu bidu ida ne’e atu husu bensaun matak-malirin husi Papa ba timoroan hotu tantu peregrinu sira ne’ebé bá simu Papa direta no sira ne’ebé labele mai simu tanba kondisaun moras no iha atividade seluk.
“Ita husi Ainaru prepara bidu ida ne’e hodi oferese ba Papa Francisco, maibé bidu ne’e ita sei halo iha ita-nia fatin ne’ebé komisaun sira prepara ona iha eis-edifisiu Arte Moris nia oin,” koordenador ne’e dehan ba Tatoli iha Comoro, ohin.
João Bossa esplika katak bidu ida ne’e reprezenta munisípiu Ainaro, tanba ne’e sira iha esperansa boot katak ho bidu ida ne’e Papa bele husik hela mensajen ba timoroan hotu, liuliu ba labarik no joven sira nu’udar jerasaun foun.
Husi observasaun jornalista Tatoli, munisípiu Ainaro no Aileu nia peregrinu sira tama ona iha fatin idaidak nian no ba sira ne’ebé hetan responsavel ba simu Papa hamriik hamutuk ona ho peregrinu sira seluk.
Maske rai-manas, maibé sira entuziazmu tebes hodi bidu no hein papa ninia prezensa. Aleinde ne’e, sarani sira seluk mós hamriik nakonu ona dalan protokolu iha área Comoro nian. Bainhira Papa to’o sira sei simu ho kanta no basa-liman.
Notísia relevante: Ekipa dansa kultura Viqueque preparadu simu Amu Papa Francisco iha estrada Bebora
Jornalista: Tomé Amado
Editora: Maria Auxiliadora
