Grupu dadolin hahú prepara ona iha Motael simu Papa Francisco
DILI, 09 setembru 2024 (TATOLI)–Grupu tebe dadolin husi Igreja Motaél, segunda dadeer, tuku 09:00, hahú prepara hodi simu Papa Fransisco iha dalan ninin.
“Ami husi grupu dadolin Motael, agora prepara ona do que tarde, di’ak liu prepara antes Amu Papa mai, ne’ebé ami sente furak liu kuandu ami prepara antes,” Ekipa grupu dadolin, Raquel de Araújo, hato’o ba Agência Tatoli.
Nia hateten, antes ne’e halo ona treinu, tanba ida-ne’e hanesan parte kulturál Timor-Leste nian, nune’e persiza preparasaun di’ak atu hatudu ba bainaka espesiál husi Vatikanu.
“Ohin ami na’in-326 hamutuk ona iha ne’e, ami prepara ona ba tebe dadolin de’it, ami husi ne’e grupu Motael, maibé balun husi Bebonuk, Surikmas, espesiál ba Motael de’it,” Raquel de Araújo, akresenta.
Notísia relevante : Dili hakmatek hein Santu Padre Papa Fransisco
Iha fatin hanesan, Julieta de Jesus Pereira, ne’ebé hela iha Kampu-Alor, konsidera liuhusi tede no dadolin ne’e bele simu matak malirin husi Papa Fransisco.
“Ami sente kontente loos tanba maski Amu Papa idade ona, maibé bele vizita ita-nia rain, ne’ebé ami entuziasmu atu prepara simu bensaun iha lorokraik ne’e,” nia orgullu.
Jornalista : Abílio Elo Nini
Editora : Julia Chatarina
