LIQUIÇÁ, 09 setembru 2024 (TATOLI) – Tuir observasaun Jornalista TATOLI iha área Kaitehu, aldeia Mata-ikun, suku Mota-Ulun, postu administrativu Bazartete, munisípiu Liquiçá tuku 11:23 movimentasaun transporte públiku no privadu menus no situasaun hakmate.
Ambiente iha dalan públiku ne’e hakmatek tanba sarani sira husi munisípiu Liquiçá kompletu ho uniforme, bandeira Vatikanu no RDTL viajen hotu ba Dili hamriik iha dalan-ninin hodi prepara simu prezensa Sua Santidade Papa Francisco ne’ebé tuir ajenda sei to’o aeroportu internasionál Nicolau Lobato tuku 14:10.
Iha dalan-ninin komunidade balu kontinua halo atividade negósiu hanesan fa’an bee-ákua, pop mie, supermi, rebusadu no seluk tán hodi hein prezensa peregrinu husi munisípiu Bobonaro ne’ebé daudaun ne’e iha ona dalan dezloke ona mai fatin konsentrasaun Kaitehu, Liquiçá.
Maske situasaun hakmatek maibé ekipa seguransa ‘povu mutin’ kompostu husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) kontinua halo patrullamentu hodi garante seguransa ne’ebé nakonu ho pas no estabilidade.
Enkuantu ekipa avansadu no komunikasaun munisipál mós prepara hela kondisaun atu simu peregrinu sira.
Notísia relevante: Governu prepara ona kondisaun ba sarani Bobonaro iha Kaitehu
Antes ne’e Governu liuhosi Komisaun Nasionál ne’ebé responsável hosi Ajénsia Dezenvolvimentu Nasionál (ADN) hamutuk kompañia Haksolok, instala hotu ona bee-moos no saneamentu bázika hanesan sintina no hariis-fatin ho totál unidade 45 iha fatin konsentrasaun sarani minisípiu Bobonaro iha área Tasi-Ibun Kaitheu, aldeia Mota-Ikun, suku Mota-Ulun, postu administrativu Bazartete, munisípiu Liquiçá.
Hariis-fatin ho sintina ne’e konstrui iha uma unidade sia, ne’ebé sei fahe ketak-ketak ba feto no mane kompleta ho bee no bainhira bee-mos ne’e hotu sei hetan apoia tán hosi ekipa Bombeiro munisípiu Bobonaro ho ekipa nasionál atu hakonu fila-fali.
Notísia relevante: Sarani Bobonaro rihun 20 sei partisipa misa iha Tasi-Tolu
Kona-bá preparasaun seluk hanesan eletrisidade mós instaladu ona hodi fasilita pregrinu sira hela iha naroman no ba nesesidade seluk ne’ebé liga ba eletróniku nia.
Kompañia mós prepara ona lona 50 atu nahe ba rai, maibé komisaun sei koordena ho liña ministeriál balu no ekipa avansadu autoridade munisípiu Bobonaro atu apoia tán materiál lojístika liuliu tenda, atubele prepara-fatin deskansa ne’ebé di’ak ba sarani sira iha tempu kalan atubele prepara-aan partisipa misa iha Tasi-Tolu, Dili, ne’ebe prezide husi Sua santidade Papa Fransisco.
Notísia relevante: Sarani hosi Bobonaro sei konsentra iha Kaitehu
Jornalista: Sérgio da Cruz
Editór: Evaristo Soares Martins
