DILI, 09 setembru 2024 (TATOLI)—Sua Santidade Papa Francisco, segunda (09 setembru 2024), hasoru malu ho Prezidente Repúblika, José Ramos Horta, no hala’o enkontru ho Xefe Governu no membru sira, sosiedade sivíl no korpu diplomatiku sira iha Palásiu Prezidénsiál Nicolau Lobato, bairru Pite, Dili.
Notísia Relevante: Papa Francisco: “Buat furak liu ne’ebé Timor-Leste iha mak nia emar sira”
Iha enkontru ne’e nia rohan, sua Santidade Papa Francisco husi hela mensajen bensaun nian ba Prezidente Repúlik, Xefe Governu no membru Governu Konstitusinál da-sia (XI), sosiedade sivíl, korpu dipllamatiku sira no povu Timor-Leste tomak hodi ko’alia dalen Tetun ho loloos no momoos.
“Maromak haraik bensaun ba Timor Lorosa’e,” Papa Francisco hateten liuhusi ninia diskursu durante enkontru ho autoridade Timor-Leste iha Palásiu Prezidensiál.
Iha biban ne’e, Papa Francisco hato’o agradesimentu ba povu Timor-Leste nia akollimentu ne’ebé delikadu no ksolok iha hodi simu ninia vizita pastorál iha Timor-Leste.
Santu Padre hateten, rai Timor-Leste ne’e fanu sentimentu sira dame nian no ksolok nian iha fuan, ne’ebé liu ona faze ida-ne’ebé todan iha nia pasadu no esperiénsia ajitasaun no violénsia ne’ebé dalabarak akontese bainhira povu ida manán independénsia tomak.
Haree ba Timor-Leste nia pasadu resente no saida mak realiza ona to’o agora, iha razaun atu fiar katak nasaun TL mós sei bele hasoru difikuldade no problema sira-ne’ebé hasoru ho matenek no kreatividade.
“Ha’u konfia Timor-Leste no ninia povu tomak ba Imakulada Konseisaun nia protesaun, imi-nia padroeira lalehan nian, ne’ebé invoka iha-ne’e ho títulu Virjen Aitara nian, atu Nia akompaña ita-boot sira no ajuda nafatin ita-boot sira iha misaun atu harii nasaun ida livre, demokrátiku no apoiante, iha-ne’ebé laiha ema ida mak sente eskluidu no ema hotu bele moris iha dame no ho dignidade,” nia dehan.
Notísia Relevante: Papa Francisco to’o ona iha Aeroportu Prezidente Nicolau Lobato
Jornalista : Nelson de Sousa
Editór : Cancio Ximenes
