DILI, 09 Setembru 2024 (TATOLI) – Peregrinu sira hosi Parókia Tilomar, Postu Administrativu Tilomar, Munisípiu Covalima entuziasmu simu Papa Francisco iha Igreja Aimutin, Comoro nia-oin ho bidu likurai.
“Ohin, ami tebe ho bidu likurai hodi simu amu Papa, tebe ne’e baibain ami uza hodi simu nai ulun sira. Ami mós hatais no uza atributu kulturál husi ami-nia beiala sira nian, hanesan kaibauk no keke”, konta Jeferina de Oliveira Lino, reprezentante peregrinu hosi Covalima ba Tatoli, hafoin simu vizita papál, iha Comoro, Dili.
Tuir Jeferina de Oliveira Lino, grupu ne’e kompostu husi ema nain-18 no halo preparasaun semana ida-resin.
Iha fatin hanesan, Sekretáriu Komisaun Organizadora ba Peregrinu hosi Covalima, Alberto Moniz de Araújo, hateten katak peregrinu sira prepara mós estatua Na’in-Feto Maria Auxiliadora no Santu António iha armida hodi hetan bensaun hosi Papa.
Nia dehan, estatua Na’in-Feto Maria Auxiliadora sei tau iha Parókia Ave Maria Suai Vila no Santu António sei tau iha edifísiu Komando Polísia Nasionál Timor-Leste Covalima.
“Ami orgulho no kontente hodi simu Sua Santidade, bainhira liu-husi ami nia oin karik ami sei husu bensaun no grasa ba iha Munisípiu Covalima. Tanba ne’e, ami mós prepara tersu, bee no estatua ki’ik sira seluk hodi bensaun”, tenik nia.
Notícia relevante: Peregrinu 4.365 hosi Covalima too ona fatin konsentrasaun
Jornalistaː Domingos Piedade Freitas
Editoraː Isaura Lemos de Deus
