DILI, 10 setembru 2024 (TATOLI)–Servisu Voluntáriu Konsellu Polísia Komunitária (KPK), Marito da Cruz, hateten servisu seguransa voluntáriu ba vizita Pastoral no Estadu sua Santidade Papa Francisco nian ne’e, hanesan momentu úniku ba iha nia moris tomak durante loron tolu (09-11 setembru) ne’e.
Notísia Relevante: Dili hakmatek hein Santu Padre Papa Fransisco
Nia hateten, nu’udár sarani ne’ebé pertense ba iha igreja katólika ho nia maioria populasaun liu 90% iha Timor-Leste ne’e, sente kontente ho vizita no prezensa amu Papa Francisco nian iha Timor-Leste.
“Ha’u prontu halo servisu voluntáriu to’o bainhira de’it, tanba hakarak akompaña amu Papa nia vizita ho di’ak. Vizita Papa dala ida de’it, só tempu de’it mak bele, la’ós mai loron-kalan ne’e, ami pronto nafatin,” Marito da Cruz hateten ba Agência TATOLI, iha Motael, segunda ne’e.
Voluntariu ne’e mós agaradese tebes ba oportunidade ida-ne’e hodi bele haree amu Papa iha nia moris, no bele envolve iha seguransa KPK hodi servisu ajuda seguransa no defeza ba vizita Papa nian.
“Ami kontente nafatin. Bele sente hamlaha no hamrook, ami hein nafatin. He’in nafatin to’o bainhira mak nia fila,” nia hateten.
Marito da Cruz hateten, molok tama iha servisu voluntáriu ne’e hetan mós oportunidade tuir formasaun hodi servisu voluntáriu iha ekipa seguransa ba vizita amu Papa nian durante loron tolu.
Iha fatin seluk, Silvina Fátima mós hato’o nia sentimentu haksolok bele partisipa atividade servisu husi parokia Balide nian iha vizita amu Papa nian.
“Ha’u sente kontente partisipa iha servisu voluntáriu iha eventu vizita amu Papa nian nu’udar Uniaun Eskuteiru Nasionál Timor-Leste (UNE-TL),” Silvina Fátima hateten ba Agência Tatoli, iha Tasi-Tolu.
“Ne’e momentu úniku ba servisu voluntariu iha vizita Amu Papa nian,” nia dehan.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
