Peregrinu Oé-Cusse fila lori ho grasa barak tanba simu ona bensaun
DILI, 12 Setembru 2024 (TATOLI) – Sarani pur volta 700 filafali, ohin, bá Rejiaun Administrativa Espesiál Oé-Cusse (RAEOA) hafoin partisipa misa solene iha Tasi-Tolu, iha loron 10 Setembru.
Antes dezloka bá Oé-Cusse, Gaspar Naheten, dehan fila lori ho grasa barak tanba hetan ona bensaun husi Papa Francisco no haree direta Papa ne’ebé sei sai hanesan istória ida ba nia.
Notísia relevante: Governu-Igreja felisita povu TL ba susesu vizita Papa Francisco
“Ha’u mai husi Oé-Cusse, liuhusi tasi la saugate. Iha folin boot tebes mai ha’u, tanba mai hasoru Papa Francisco no hetan duni bensaun iha misa Tasi-Tolu. Ha’u hela iha ne’e semana ida ona, maibé la sente baruk no kolen”, Gaspar Naheten afirma ba Tatoli iha Pelican Paradise, ohin.
Nia dehan fila bá Oé-Cusse ho kontente, maske semana ida iha fatin akantonamentu sofre ba rai-rahun, maibé konsege tuir misa no fila hodi lori bensaun Na’i Maromak nian ba família.
Nia konsidera prezensa Papa Francisco iha Timor-Leste, nu’udar Jesus Kristu nia saseluk, ne’ebé mai tau-matan ba nia bibi sira iha mundu rai-klaran, liuliu iha Timor-Leste.
“Ha’u haree direta maske la kaer liman, tanba momentu Amu Papa mai, ha’u hamriik iha liña oin kedas, la’ós haree husi televizaun. Ida ne’e grasa boot mai ha’u, tanba ita lahatene bainhira mak mai tan, tanba uluk mai iha 1989, liu tiha tinan barak mak foin mai fali iha tinan ne’e. Ida-ne’e grasa boot ba ita nu’udar Timor-Leste,” nia admira.
Iha sorin seluk, Domingos Anin husi Parókia Numbei agradese ba komisaun organizadora, tanba prepara ona fatin ne’ebé sufisiente ba sira durante iha Dili atu simu bensaun husi Papa.
“Ami la preokupa kona-ba atendimentu. Ita haree igreja ho Governu akompaña komunidade ho di’ak, ne’ebé hanesan sarani, sente orgullu no agradese, tanba mai sa’e ró gratuita, prepara hela fatin hodi mai partisipa misa no ohin ami fila ona, maibé fila ho grasa ida ba ha’u, tanba simu ona bensaun”, nia dehan.
Notísia relevante:Ohin, peregrinu 500 husi Oé-Cusse viajen uluk ho ró Berlin Ramelau
Lembra katak peregrinu Oé-Cusse na’in-500 halo ona, horisehik, viajen dahuluk no ohin kontinua bá to’o etapa ikus iha loron 13 Setembru hamutuk 700-resin.
Jornalista: Abílio Elo Nini
Editora: Maria Auxiliadora
