DILI, 13 setembru 2024 (TATOLI)–Diretór Eskola Ensinu Sekundária Jerál (ESJ) 05 Maiu Becora, Casmiro Dias Marques, hateten, konstrusaun eskola foun ne’e paradu besik fulan-ida ona.
“Obra ida-ne’e ohin loron seidauk finaliza, ne’e problema saida ha’u ladún hatene, maibé kuaze semana tolu resin ona traballadór sira la halo serbisu no husik de’it hanesan ne’e,” Diretór informa iha ninia knaar fatin, Becora, sesta ne’e.
Nune’e, nia husu ba Ministériu Edukasaun (ME) atu identifika problema tanba daudaun ne’e saladeaula iha eskola públika ne’e la sufisiente inklui laiha biblioteka.
“Ami preokupa liu kondisaun saladeaula iha eskola ne’e. Agora ami uza sala hamutuk 13, ami presiza tan sala ualu, nune’e estudante sira bele tuir prosesu ensinu aprendizajen ho di’ak, tanba iha sorin ne’e sala la sufisiente. Ami rekomenda ba Ministériu Edukadaun atubele ko’alia ho kompañia atu solusiona problema ida-ne’e. Biblioteka mós laiha fatin atu tau livru sira ne’e iha laran,” nia akresenta.
Notísia relevante : Eskola ESJ 05 maiu menus espasu ba estudante finalista partisipa ezame nasionál
Aleinde ne’e, estudante sira labele asesu ba livru iha biblioteka tanba daudaun ne’e hadi’a hela.
“Agora profesór sira tuur iha sira-nia fatin mak estudante sira tama sai tama ne’e ladun di’ak. Fatin biblioteka tenke ketak para ita halo oráriu ba sira, nune’e sira bele asesu. Daudaun ne’e ita atu haruka sira asesu ba livru mós ladún di’ak ne’e sala profesór nia, imajina profesór sira enkontru ruma mak estudante sira nadodon tama bá laran mós ambiente ladún di’ak,” nia tenik.
Projetu konstrusaun saladeaula ualu inklui biblioteka hahú iha loron 20 abríl 2022 no tuir planu sei ramata iha 20 outubru 2022.
Obra ne’e rasik responsável husi Maluk Unipesoal, LDA, ho totál kustu $355.628,46.
Jornalista : Osória Marques
Editora : Julia Chatarina
