OÉ-CUSSE, 16 Setembru 2024 (TATOLI) – Profisionál saúde na’in-30 husi sentru saúde lima iha Rejiaun Administrativa Espsiál Oé-Cusse Ambeno (RAEOA) partisipa formasaun hodi hasa’e koñesimentu kona-ba vasina kontra vírus papiloma umanu (HPV, sigla inglés) no imunizasaun difteria-tétanus (DT).
Iha abertura atividade ne’e, Sekretáriu Rejionál ba Asuntu Saúde, Luís de Jesus Neno, hateten formasaun ne’e nu’udar preparasaun molok halo kampaña vasinasaun kontra HPV hodi prevene kankru kolu úteru ba inan-feton sira idade entre 11 no 14.
“Ita saúde ne’e tenke serbisu profisionál, tenke hetan treinamentu ho di’ak. Antes ne’e, na’in-lima tuir ona iha nasionál, ohin, sira mak sai fali formadór. Depois sira-ne’ebé ohin tuir ona formasaun mak sei fó formasaun tan iha nivél sentru saúde sira mak hafoin ita bele tuun bá komunidade no eskola sira atu halo vasinasaun”, Luís Neno hateten iha Otél Inur Sakato, Oé-Cusse.
Formasaun ne’e sei hala’o durante loron rua, entre 16 no 17 setembru, envolve formandu na’in-30, reprenzenta kada sentru saúde ema na’in-neen, komposta husi xefe sentru saúde, responsavel imunizasaun, vizilánsia, promosaun no seluk tan.
“Ha’u husu ita hotu, durante loron rua, partisipa formasaun ne’e tama tuir oras, labele balun mak tuir, balun sai bá fuma fali iha li’ur. Ida-ne’e labele akontese, tanba formasaun hanesan ne’e Estadu gasta osan barak. Pelu menus matéria sira-ne’ebé formadór sira aprezenta loron rua ne’e persiza entende, tanba formasaun ne’e nia objetivu atu hasa’e koñesimentu no kapasidade”, nia fó hanoin.
Notísia relevante: Prevene kankru serviks, saúde Oé-Cusse introdús impaktu vasina HPV iha Pante Makasar
Reprezentante Organizasaun Mundiál Saúde (OMS), Dulce Pereira, esplika objetivu husi formasaun ne’e atu hasa’e koñesimentu profisionál saúde sira-nian kona-ba vasina HPV, nune’e prepara materiál saida mak persiza iha tempu implementasaun nian.
“Ita-nia preparasaun ba iha atividade kampaña ida-ne’e hanesan advokasia, numerasaun iha vasina no seluk-tan. Entaun, formasaun durante loron rua ne’e sufisienta ona. Tuirmai mak oinsa numerasaun hodi hasa’e kobertura ida-ne’ebé di’ak, tanba ita hakarak [vasinasaun iha] munisípiu hotu liu 95% no to’o 100% ne’e di’ak liutén”, nia dehan.
Notísia relevante: 2014-2023: Fundasaun Alola rejista kankru susun no serviks hamutuk 245
Tuir dadus, Servisu Saúde Oé-Cusse rejista eskola hamutuk 37 mak alvu ba vasina kontra HPV.
Kaléndariu ba kampaña vasina HPV iha Oé-Cusse seidauk fiksa, tanba sei fó tan formasaun ba profisionál saúde sira iha sentru saúde no postu saúde sira. Iha faze dahuluk implementasaun vasina sei fó ba labarik feto idade 11 no 14, faze daruak ba idade 12 no 13.
Ministériu Saúde sei hahú vasinasaun kontra HPV, iha territóriu, ba labarik sira atu prevene kankru kolu úteru iha loron 23 Setembru.
Lembra katak iha 19 Jullu 2024, Governu hamutuk ho parseiru sira hanesan Organizasaun Mundiál Saúde, Fundu Nasaun Unida ba Labarik, Australian Aid, Aliansa Vasina, lansa vasina HPV hodi prevene kankru kolu úteru ba labarik feto iha Timor-Leste.
Notísia relevante: Ministériu Saúde kontinua vasina HPV iha 23 setembru
Jornalista: Abílio Elo Nini
Editora: Maria Auxiliadora
