DILI, 17 setembru 2024 (TATOLI)–Ministériu Edukasaun (ME) liuhusi Diresaun Nasionál Infraestrutura fó karta ona notifikasaun ba empreza Maluk Unipesoal, LDA ne’ebé responsável kaer projetu konstrusaun ba Eskola Ensinu Sekundáriu Jerál (ESJ) 05 maiu Becora.
“Tanba konstrusaun ba eskola ne’e paradu ona, entaun daudaun ne’e karta notifikasaun husi parte Diresaun Nasionál Infraestrutura fó ona ba sira, husu ona sira-nia disponibilidade atubele kontinua ka lae, se sira la kontinua ba tempu ne’ebé determina maka ita sei hapara sira-nia kontratu,” Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, hateten, iha salaun INFORDEPE, Balide, tersa ne’e.
Notísia relevante : Konstrusaun Eskola ESJ 05 Maiu Becora paradu besik fulan-ida
Governante ne’e dehan, karik empreza ne’e labele kontinua serbisu, maka ME sei halo prosesu foun hodi bele hetan empreza seluk bele kontinua projetu ne’e to’o ramata.
Enkuantu, konstrusaun Ensinu Báziku Filiál (EBF) Fatuhada maski tarde maibé nia andamentu di’ak.
“Maski tarde maibé nia andamentu di’ak loos, entaun ida-ne’e sei mantein to’o ramata,” nia tenik.
Projetu konstrusaun ba ESJ 05 maiu ne’e kompostu husi sala aula hamutuk ualu inklui ho biblioteka, ho kustu obra $ 355.628.46. Projetu ne’e hahú iha loron 20 abríl 2022 no ramata iha loron 20 outubru 2022.
Jornalista : Osória Marques
Editora : Julia Chatarina
