DILI, 19 setembru 2024 (TATOLI)–Ai-funan sira-ne’ebé kuda iha Jardin Faról no iha jardin Timor Lodge nia oin ne’e, ai-funan balun buras no balun namlaek hotu ona tanba laiha jardineiru ne’ebé atu tau matan hodi rega.
Notisia Relevante: Seven Star esforsa hodi finaliza reabilitasaun jardín Faról no entrega ba Governu
Diretór kompañia ASET, Augusto Soares, hateten empreza termina ona obra reabilitasaun iha fulan haat liuba maibé sira-nia parte seidauk entrega ba Governu.
“Kompañia hein de’it, bainhira Governo dehan atu entrega, ami entrega de’it ona. Obra hotu ona maibé seidauk entrega,” Diretór kompañia ASET, Augusto Soares, hateten ba Agência Tatoli liuhusi WhatShapp, kuarta ne’e.
Governu hamutuk ho kompañia, nia hateten, ba halo ona inspesaun ba obra reabilitasaun ba jardin ne’e maibé seidauk iha desizaun ida hodi entrega.
Kompañia ho Governo hamutuk ba halo ona inspesaun, buat ruma mak falla iha ne’ebá hanesan ai-funan balun mate, ne’e responsabilidade empreza nian molok entrega ba Governu,” nia hateten.
Iha sorin seluk, ai-funan sira-ne’ebé kuda iha jardin Faról nian ne’e mos iha ai-funan mate, tanba karik laiha jardineiru ka tékniku husi empreza sira-ne’ebé tau matan hodi rega ai-funan sira-ne’e.
Tuir observasaun Tatoli, iha jardin Faról nian ne’e, bee ne’ebé atu utiliza rega duut sira iha jardin laran ne’e disponivel hodi rega nafatin ai-funan no duut sira-ne’e kontinua moris, no ai-funan balun tanba karik la tau matan ka la rega ho bee entaun namlaek no balun mate.
Rekorda katak serimónia ba konstrusaun uma laku no jardín Farol halo ona iha loron 06 fevereiru 2023. Ministériu Obra Públika no Sekretaria Estadu Arte no Kultura (SEAK) prevee ona orsamentu hamutuk $422.653 ba obra ne’e.
Empreza Seven Star Dini ho nia konsórsiu Quatro Colega mak hala’o obra ne’e tanba konsidera Quatro Colega iha ona esperiénsia hodi hala’o konstrusaun ba jardín, tanba halo ona projetu hanesan iha B.J Habibie.
Tuir kontratu, reabilitasaun jardín no konstrusaun uma laku hahú hosi 01 fevereiru bainhira asina ona orden servisu entre Ministériu Obra Públika no Seven Star Dini, ne’ebé sei termina iha loron 01 fulan-agostu.
Jardín ne’e ninia naruk kuaze metru 300 sei konstrui hosi área direitu umanu nian ba to’o iha rua Palapasu. Jardín ne’e rasik tuir Diresaun Jerál Abitasaun Urbanizmu nian seidauk iha naran espesífika ida, tanba ne’e mantein ho naran jardín Faról.
Notisia Relevante: Reabilitasaun jardin matak iha Timor Logde oin seidauk finaliza
Jornalista : Jesuína Xavier
Editór : Cancio Ximenes
