DILI, 19 setembru 2024 (TATOLI)—Parlamentu Nasionál (PN) iha proposta Orsamentu Jerál Estadu (OJE) ba tinan 2025 prevee millaun $23.5 hodi fó prioridade ba programa haat (4).
Notísia Relevante: Orsamentu privativu PN iha 2025 millaun $23-resin aprovadu
Sekretáriu Jerál Parlamentu Nasionál, Edgar Sequeira Martins, hateten horisehik liuhusi reuniaun plenária PN aprova ona orsamentu privativu PN ba 2025 ho montante millaun $23.5 hodi bele finansia programa prioridade sira.
“PN iha programa tinan 2025 nian ne’ebé hatuur ona iha nia planu estratéjiku, ne’ebé iha programa prioridade haat, sub-programa walu no atividade 23 sai baze PN hodi tau nia orsamentu sira-ne’e, orsamentu pur programa no nia alokasaun orsamentu tuir programa sira-ne’ebé iha,” Nia hateten ba jornalista sira iha resintu PN, kinta ne’e.
Programa haat mak hanesan fortalesimentu instituisionál, fortalesimentu lasu amizade Parlamentu, iha asuntu konstitusionál no mós ba funsionamentu Parlamentu.
Tanba ne’e, PN horisehik diskute no aprova ona tetu orsamentu ba tinan 2025 hodi bele haruka ba Governu, hafoin Governu ajusta ho Orsamentu Jerál Estadu (OJE) 2025 tomak, hafoin sei haruka fali mai PN hodi halo diskusaun ikus no aprova.
“Aprovasaun horisehik ne’e provizóriu hodi haruka ba Ministériu Finansa hodi ajusta hamutuk OJE ba tinan 2025,” nia dehan.
Antes ne’e, PN simu tetu husi komite revizaun orsamentu fó millaun $20-resin, maibé hafoin diskusaun proposta orsamentu iha millaun $23.5 hodi bele kobre programa no atividade órgaun soberania daruak ne’e iha tinan oin.
Notísia Relevante: FRETILIN husu koa osan viajen estranjeiru hodi halo poupansa
Jornalista : Nelson de Sousa
Editór : Cancio Ximenes
