𝗗𝗜𝗟𝗜, 19 setembru 2024 (TATOLI)–Prezidente Republika (PR), José Ramos Horta, prefere Governu sira tau osan boot iha setór edukasaun nune’e bele hadi’a infraestrutura no kualidade edukasaun rasik.
“Governu liuhusi Ministériu Edukasaun tenke haree didi’ak tau orsamentu boot liu ba edukasaun, tenke prioridade numero um, orsamentu atu halo saida, hadi’a eskola sira iha Timor, lalika luxu, halo kualidade iha sintina, hariis fatin, uma kakuluk labele kuak, haree tau internet, tenke haree enfermeiru ida ka rua iha grupu eskola,” PR Horta hateten bainhira ramata halo vizita ba eskola STM Bekora, kinta ne’e.
Notísia relevante : TL-Portugal kontinua reforsa kooperasaun iha setór edukasaun no justisa
Xefe Estadu dehan, presiza haree infermeiru ida ka rua destaka iha eskola sira hodi haree nutrisaun di’ak ba estudante sira, mobiliza estudante sira hamutuk ho Diretór eskola kuda modo, kuda ai-fuan iha eskola, maibé presiza organiza didi’ak no aloka orsamentu.
Aleinde ne’e, Prezidente Repúblika sujere aumenta saláriu no vensimentu ba profesór sira, nune’e profesór sira bele hatene sira-nia responsabilidade.
“Ha’u haree vensimentu profesór la a’at liu uluk nia $300, $400, ne’e di’ak oituan ona, tau osan boot ba deputadu sira, asesór, adidu embaixada, nusa la tau ba mestre sira liu-liu profesór sira iha foho,” nia tenik.
Jornalista : Osória Marques
Editora : Julia Chatarina
