DILI, 13 setembru 2024 (TATOLI)- Governu Timor-Leste ho Governu Portugués kontinua reforsa kooperasaun iha área edukasaun no justisa.
Primeiru-Ministru, Xanana Gusmão konsidera hanesan ondra bo’ot ida tanba antes ne’e simu ona Primeiru-Ministru Portugal nian, António Costa ho Ministru Justisa Portugal no agora simu tán Ministru Negósiu Estranjeiru, Paulo Rangel ne’ebé promete atu haruka tan Ministru edukasaun Portugal nian mai iha futuru.
“Ami na’in rua ko’alia kona-ba kooperassun ho Timor-Leste iha área barak, maibé konkorda malu iha área rua ne’ebé importante tebes mak edukasaun no justisa,” Xanana Gusmão hateten hafoin enkontru ho Ministru Negósiu Estranjeiru Portugal Paulo Rangel iha Palásiu Governu, ohin.
Xefe Governu dehan, iha setór edukasaun esplora kona-bá kapasitasaun rekursu umanu nian mak hanesan, formasaun bá professór sira iha ensinu Lian Portugés ho espansaun eskola Cafe, tanba Timor nu’udár nasaun membru bá nasaun sira ne’ebé ko’alia Lian Portugéz (CPLP sigla portugés).
Iha fatin hanesan, Ministru Negósiu Estranjeiru Portugal, Paulo Rangel agradese bá ospitalidade no akollimentu hosi Primeiru-Ministru, Xanana Gusmão no hakarak hateten katak, reuniaun ida-ne’e importante tebes tanba bele ko’alia kona-bá estabelesimentu no reforsa kooperasaun bá tinan 2024 to’o 2028 iha área edukasaun no justisa nian.
“Portugal hakarak kontinua fó apoiu formasaun ba timoroan sira iha área rua ne’e tanba Timor-Leste iha nia valór demokratiku iha rejiaun ne’e,” Ministru ne’e hateten.
Paulo Rangel mós louva hodi kongratula Timor-Leste tanba tinan ne’e iha ámbitu komemorasaun tinan 25 konsulta populár, konsege hetan vizita espesiál hosi lider mundiál Organizasaun Nasaun Unidas (ONU), António Guterres no mós vizita aas-liu mai hosi Sua Santidade Papa Francisco.
Jornalista: Hortencio Sanchez
Editór: Florencio Miranda Ximenes
