OÉ-CUSSE, 20 Setembru 2024 (TATOLI) – Sentru Komunitáriu Aprendizajen (SKA) sira iha Oé-Cusse falta atensaun husi Servisu Edukasaun, maibé hetan apoia barak liu husi ajénsia internasionál sira hanesan UNESCO no Banku Mundiál, informa Koordenadór Rejionál ba Ensinu Rekorrente Rejiaun Administrativa Espesiál Oé-Cusse Ambeno (RAEOA), Paulo de Jesus Elo.
“Durante ne’e ami hetan apoiu husi parseiru sira. Iha SKA Baqui, Banku Mundiál mak apoia no SKA Lifau ami hetan tulun másimu husi UNESCO, maibé kona-ba ekipamentu, liuliu eskola atu uza iha prosesu aprendizajen nian, ami nunka mais atu hetan husi Edukasaun Oé-Cusse”, Paulo de Jesus Elo afirma ba jornalista sira.
Notísia rekevante: Sentru Komunitáriu Aprendizajen Oé-Cusse prepara estudante 40 realiza ezame nasionál
Nia fó ezemplu katak osan konsesaun eskolár, merenda eskolár no subsídiu ba área remota mak iha problema boot, tanba SKA balun iha munisípiu seluk hetan kada tinan, maibé ba RAEOA durante ne’e la asesu.
“Dalaruma husi Diresaun Nasionál Ensinu Rekorrrente husu fali ami dehan oinsá ho imi-nia subsídiu, maibé ami la hetan no la asesu ida. Ami mós lahatene husi nasionál aprova iha ne’ebé, ami buka maibé lahatene, tenta husu ba edukasaun sira, maibé laiha resposta”, nia kestiona.
Aleinde ne’e, kona-ba ekipamentu sira atu apoia prosesu ensinu-aprendizajen barak mak laiha no mákina impresora, tinta, komputadór sira-ne’e hetan fali tulun husi UNESCO, maibé la sufisiente.
“Inspetór eskolár de’it mós laiha atu mai halo monitorizasaun. Nunka mai atu fó motivasaun mai iha eskola ne’e. Problema sira-ne’e ami hato’o liuhusi karta pedidu hodi submete ba edukasaun rejionál, maibé ami mós lahatene bainhira mak responde. Ami tenta bá husu tuir, maibé responde dehan hein lai. To’o agora seidauk iha resposta, maibé ami kontinua hein”, nia dehan.
Notísia rekevante: ME prevee rihun $409.3 ba programa ensinu rekorrente
Iha fatin hanesan, Prezidente Sentru Aprendizajen Komunitáriu Oé-Cusse, Joaquim de Araújo, reforsa katak kona-ba materiál didátiku sira ne’e apoia husi Diresaun Nasionál Ensinu Rekorrente hanesan livru, kadernu no lapijeira.
“Ida-ne’e ami sente sufisiente, maibé ba de’it profesór sira, tanba tuir loloos iha kurríkulu, alunu sira tenke hetan livru atu lori bá uma hodi estuda, maibé ita haree la sufisiente entaun profesór de’it mak uza livru hodi esplika no alunu sira hakerek”, nia hateten.
Hatán ba preokupasaun ne’e, Sekretária Rejionál ba Asuntu Edukasaun no Sosiál, Inácia Tamele, rejeita fó komentáriu tanba sei orienta inspetór eskolár sira atu rekolla informasaun, nune’e bele tetu molok fó apoiu.
“Ha’u lakohi responde asuntu ne’e, tanba ha’u iha ekipa inspetór eskola. Ha’u sei haruka sira bá rekolla no observa saida mak persiza atu apoia, maibé atu hateten de’it katak autoridade foun mai ne’e ami ezekuta de’it planu autoridadae sira uluk nian, ne’ebé ekipa sei bá haree”, Inácia dehan iha otél Ambeno.
Notísia rekevante: EhD: Presiza aselera elaborasaun kurríkulu ekivalente ba sekundáriu iha ensinu rekorrente
Diresaun Nasionál Ensinu Rekorrente estabelese ona Sentru Komunitáriu Aprendizajen rua, ida iha Baqui, iha suku Naimeko ho estudante na’in-11 no seluk iha Lifau, iha Costa, ne’ebé akumula estudante 61.
Jornalista: Abílio Elo Nini
Editora: Maria Auxiliadora
