DILI, 21 setembru 2023 (TATOLI) – Ema ho defisiénsia (EhD) besik 300 mak akaba ona sira-nian estudu iha ensinu rekorrente iha terseiru siklu no hein atu kontinua ba ensinu sekundáriu, maibé daudaun seidauk iha kurríkulu ekivalente atu permite sira hakat bá nivel tuirmai.
Tanba ne’e, Diretór-Ezekutivu Asosiasaun Defisiénsia Timor-Leste (ADTL), Cesário da Silva, husu ba Ministériu Edukasaun (ME) atu aselera diskusaun ligadu ho kurríkulu ekivalente ba sekundáriu iha ensinu rekorrente nian hodi autoriza EhD sira bele kontinua sira-nian estudu.
Cesário da Silva haktuir katak programa ensinu rekorrente ne’e di’ak tebes ba ema ho defisiénsia tanba bele tulun sira ne’ebé maka labele tuir prosesu aprendizajen iha eskola formál sira.
“Ensinu rekorrente ne’e labele to’o de’it iha terseiru siklu. Tenke haluan ona nia atividade to’o iha nivel sekundáriu, nune’e ema ho defisiénsia sira ne’ebé maka akaba ona sira-nian estudu iha terseiru siklu bele tama bá nivel sekundáriu”, dehan.
Nune’e nia rekomenda ba ME atu halais kurríkulu ne’e hodi bele aselera ona prosesu ezame ekivalénsia ba nivel sekundária nian atu maluk sira ne’ebé maka ho idade avansada bele tuir kedan ezame sekundáriu nian hodi hetan diploma atu hakat bá universidade.
Lembra katak Diretór-Ezekutivu Asosiasaun Halibur Matan Timor-Leste (AHDMTL), Gaspar Afonso, antes ne’e mós husu Edukasaun atu elabora kurríkulu bainhira ema ho defisiénsia sira mak ramata ona terseiru siklu bele hakat bá nível sekundáriu.
Tuir dadus 2015, eziste iha Timor-Leste ema ho defisiénsia hamutuk 38.118 – ema liu rihun 14 mak iha problema vizaun, rihun 12 mak iha problema tilun, rihun 7 mak defisiénsia motora no rihun 3-resin aprezenta distúrbiu mentál.
Jornalista: Tomé Amado
Editora: Maria Auxiliadora
