OÉ-CUSSE, 23 Setembru 2024 (TATOLI) – Tribunál Oé-Cusse funsiona normál hafoin féria judisiál durante fulan ida, ne’ebé hahú iha loron 01 Agostu to’o 15 Setembru 2024 ne’e, informa Juíz Administradór Tribunál Primeira Instánsia Oé-Cusse, Evangelino Belo.
“Fulan ida nia laran serbisu iha justisa ladún la’o, tanba ami féria judisiál, maibé agora atendimentu sira no julgamentu la’o normál ona dezde semana kotuk iha loron 16 Setembru”, Evangelino Belo hateten ba Tatoli iha Oé-Cusse, ohin.
Nia adianta iha féria judisiál ne’e nafatin atende kazu urjénsia sira hanesan arguidu detidu sira, prosesu primeiru interrogatóriu, sumáriu no prosesu providénsia kautelár sira kontinua la’o.
Notísia relevante: Féria judisiál, julgamentu iha Tribunál Oé-Cusse ba de’it kazu urjénsia
“Iha semana kotuk, ita halo ona julgamnetu balun tanba ha’u mós foin mai iha Tribunál Oé-Cusse, dadus balun seidauk halibur, maibé tuir informasaun ne’ebé iha katak durante ne’e ba kazu urjénsia la’o normál no prosesu normál mak foin hahú fali iha segunda semana kotuk, 16 Setembru ne’e”, dehan.
Juíz Administradór ne’e seidauk relata kona-ba númeru kazu ne’ebé atende durante féria judisiál, tanba foin lalais iha mudansa ba juíz no ofisiál balun bá fali Dili. “Maibé, kazu prodénsia kautelár rua, kazu sivíl ida, ba kriminál liu detidu ha’u seidauk iha dadus, tanba ha’u foin ezerse funsaun iha ne’e, ne’ebé ha’u sei rekolla dadus”, nia informa.
“Ha’u mak mai fali Oé-Cusse, tan ne’e mak dadus sira-ne’ebé iha, ami sei rekolla fali atu ba oin karik marka tuir nia tranzisaun ne’ebé normál atu aselera prosesu, katak ida-ne’ebé kazu urjénsia ka antigu ita tenke trata bazeia ida-ne’e. Ne’ebé iha semana ida-ne’e ami sei haree prosesu sira, depois semana oin fali prosesu sei la’o normál”, salienta.
Notísia relevante: Tribunál Oé-Cusse rejista kazu pendente 492, maioria kontrabandu
Tuir nia, kazu barak mak pendente iha Tribunál Oé-Cusse, tanba númeru juíz la sufisiente ne’ebé daudaun rejista kazu krime hamutuk 300-resin no prosesu koletivu singulár 342 mak pendente.
“Maibé, durante ne’e halo julgamentu ba prosesu barak. Pendente sira-ne’e tanba dalaruma difikuldade mak iha rekursu umanu, tanba juíz na’in-rua de’it, liuliu ba julgamentu koletivu sira-ne’e la’o dalaruma fulan mak foin hala’o dala ida. Ida-ne’e mak prejudika kazu pendente sira iha Oé-Cusse”, afirma.
Notísia relevante: Kazu 400-resin pendente iha Tribunál Distritál Oé-Cusse
Jornalista: Abílio Elo Nini
Editora: Maria Auxiliadora
