NOVA IORKE, 24 setembru 2024 – Primeiru-Ministru (PM), Kay Rala Xanana Gusmão, ofisialmente entrega sertidaun Repúblika Demokrátika Timor-Leste (RDTL) ba Timor-oan atuál Sekretáriu Jerál Organizasaun Nasaun Unidas (ONU), António Manuel de Oliveira Guterres, ne’ebé sente onradu no orgullu
Sertidaun RDTL ne’e, Xefe Governu Xanana Gusmão entrega direta ba António Guterres nia liman iha nia servisu fatin Kuartél Jerál ONU, hafoin abertura Simeira kona- ba Futuru iha Sesaun ba dala-79 Assembleia Jerál Nasaun Unida (AGNU sígla portugés), ohin.
“Hodi povu Timor-Leste nia naran, ami entrega Sertidaun RDTL ida-ne’e hodi rekoñese ita nu’udár Timorense,” Xanana Gusmão espressa ho kontente bainhira entrega sertidaun ba belun di’ak Guterres.
Guterres hola parte iha istória Timor-Leste no ninia vizita mai Timor-Leste nakonu ho ksolok ne’ebé marka konkluzaun ida ne’ebé signifikativu no konsidera Timor nu’udár país domin na’in no páz nian.
António Guterres sente orgullu sai sidadaun Timorense
Iha fatin hanesan, António Guterres ne’ebé hetan ona títulu sidadania hanesan Timor-oan sente orgullu no hatudu apresiasaun ba ospitalidade ne’ebé nia simu durante hala’o vizita mai Timor-Leste, hodi partisipa iha komemorasaun tinan 25 konsulta populár ne’ebé organiza hosi ONU iha tinan 1999.
“Ha’u sente orgullu no konsidera hanesan onra boot hodi sai sidadaun ba rai ida ne’ebé ha’u sempre lori iha ha’u-nia fuan,” Guterres agradese.
António Guterres moris iha Lisboa-Portugál iha tinan 1949 no kaben ho Catarina de Almeida Vaz Pinto no sira iha oan na’in-rua.
Antes ne’e Estadu Timor-Leste atribui nasionalidade ba António Guterres iha ámbitu serimónia solene komemorasaun loron konsulta populár ba dala-25 (30 Agostu 1999 – 30 Agostu 2024), iha Parlamentu Nasionál (PN) ho rezolusaun ida ne’ebé asina husi Prezidente Parlamentu Nasionál (PPN), Maria Fernanda Lay.
Hafoin entrega sertidaun ne’e, Xefe Governu Xanana Gusmão ho Guterres hala’o mós diskusaun kona-bá Simeira ONU nian, inklui fahe hanoin ba malu kona-bá problema multilateral nian, mantein pás bá nasaun hotu-hotu hodi kumpre prinsípiu demokrasia no respeita direitu umanu sidadaun sira nian hodi lori nasaun sira avansa ba dezenvolvimentu.
ONU mós komprometidu atu kontinua apoia dezenvolvimentu Timor-Leste liu-hosi ninia ajénsia sira ne’ebé hala’o servisu besik ho povu no Estadu Timor-Leste.
Notísia relavante:PN atribui nasionalidade timorense ba António Guterres
Jornalista: Hortencio Sanchez
Editór: Florencio Miranda Ximenes
