VIQUEQUE, 26 setembru 2024 (TATOLI)-Autoridade Munisípiu Viqueque no Autoridade Protesaun Sívil, kuarta ne’e, fó apoiu solidaridade ba família matebian Nívia da Cruz ne’ebé foin lalais mota lori iha suku Bahatata postu Uatucarbau munisípiu Viqueque.
“Ohin APC hamutuk ho autoridade munisípiu Viqueque apoia solidaridade hanesan foos, mina, masinmidar, supermi, sardina no seluktán hodi hakmaan família vítima,” Komadante APC munisípiu Viqueque, Cirilio Soares Gomes, hateten ba jornalista sira, iha sede suku Bahatata.
Notísia Relevante :Estudante ida mota lori iha Lautem seidauk hetan
Tuir-nia Estadu iha obrigasaun atu fó apoiu ba ninia sidadaun sira bainhira enfrenta problema dezastre naturál. “Tan ne’e, mak ami mai entrega direta apoia solidaridade ba família vítima Nivia nian,” Nia akresenta.
Ekipa Bombeiru munisipál no reforsa husi ekipa nasionál no mós servisu hamutuk ho Polisia Nasionál Timor-Leste, munisípiu Viquque hodi buka tuir matebian durante loron tolu bainhira kazu ne’e akontese maibe, la konsege hetan matebian.
Iha fatin hanesan Xefe suku Bahatata, Patricío Maria Pinto, agradese ba Autoridade Munisípiu no APC tanba fó ona apoia solidaridade ba família matebian Nivia da Cruz.
“Apoia ida-ne’e komitmentu parte Governu no PAM Viqueque sentimentu hodi fó solidaridade ba ita-nia matebian Nivia nia inan-aman. Apoia atu oituan ka barak ida-ne’e maka rekonesimentu husi ita-nia Governu ba família vítima,”nia hateten.
Nune’e mós aman husi matebian Nivía, Idelberto Aparício Guterres, agradese ba Governu ne’ebé fó apoia sosilidaridade ba família.
“Akontesementu mota lori ha’u-nia oan Nivia ne’e iha loron 18 fulan-setembru foin lais ne’e. Ami inan aman iha hotu natar, depois sai husi eskola tuku 12:30 sira ba tuir ami iha natar maka akontese mota lori sira na’in tolu, mane ida no feto ida mak sai tiha no feto ida mak mota konsege lori. Ami buka iha momentu mota lori la hetan to’o fali domingu lokraik mak hetan fali,” Nia informa.
Entretantu, matebian Nívia da Cruz ninia isin mate, iha segunda ne’e família haloot ona iha semitériu Bahatata.
Notísia Relevante :Família buka tuir hela estudante mota lori iha Lautém
Jornalista : Vitorino Lopes da Costa
Editór : Agapito dos Santos
