DILI, 26 setembru 2024 (TATOLI)—Komisaun A trata asuntu Justisa Konstituisionál iha Parlamentu Nasionál (PN), kinta ne’e, hahú halo audiénsia públika hodi diskute ho entidade relevante ba proposta-lei númeru 11/VI(2a)-autorizasaun lejislativa iha matéria fisasaun limite idade ba relasaun serbisu ba funsionáriu públiku no ajente administrative sira.
Notísia Relevante:Meza PN baixa proposta-lei autorizasaun lejislativa matéria fisasaun limite idade FP
Entidade sira-ne’ebé komisaun konvida mak hanesan Prezidénsia Konsellu Ministru, Institutu Seguransa Sosiál ho Komisaun Funsaun Públika (KFP).
“Komisaun A simu inisiativa proposta ida husi Governu mai iha PN no meza PN baixa ba komisaun, tanba ne’e área kompeténsia komisaun nian. Proposta-lei ida mai husu autorizasaun ba PN, tanba ita hatene kompeténsia atu halo lejislasaun sira relasiona ho ema-nia direitu. Tanba ne’e, Governu mai husu autorizasaun karik PN bele autoriza atu sira halo lejislasaun ida kona-ba idade reforma nian ba funsionáriu no ajente administrative sira. Ida-ne’e mak ohin ami bolu sira hanesan autór proposta-lei hodi rona sira-nia hanoin kona-ba inisiativa ida-ne’e hodi diskute uitoan,” Prezidente Komisaun A, Patrocínio dos Reis Fernandes, relata ba jornalista sira hafoin ramata audiénsia iha sala komisaun iha PN.
Nune’e, nia dehan, halo diskusaun uitoan hodi haree dezáfiu sira-ne’ebé Timor-Leste enfrenta hodi parte ezekutivu husu autorizasaun ba lejislasaun ne’e, bele fó duni solusaun ba problema sira-ne’ebé funsionáriu no ajente administrativu hasoru.
Komisaun A sei halo ninia relatóriu paresér no sei hato’o ba meza PN hodi bele tau iha ajenda, no kontinua diskute iha plenária.
Prezidénsia Konsellu Ministru ne’ebé reprezenta husi Vise-Ministru asuntu Parlamentár, Adérito Hugo da Costa, hateten Governu Konstitusionál da-sia (IX) dezde simu kna’ar ne’e tau atensaun liu ba kestaun reforma administrasaun públika nian ho koordenasaun téknika ho KFP aprezenta inisiativa ida kona-ba atu fiksa limite idade ba reforma ninian ba iha administrasaun públika.
Tanba, nia dehan, Konsellu Ministru aprova tiha ona proposta-lei ne’e envia mai PN no meza PN baixa ona ba komisaun A hodi ohin loron halo audénsia públika, nune’e bolu Prezidénsia Konsellu mai hanesan autór ba lei ne’e ho KFP, INSS hodi rona pozisaun autór lei nian molok PN fó autorizasaun lejislativa ba proposta-lei ida-ne’e.
Autorizasaun lejislativa ne’e, nia hateten, tanba iha kna’ar atu deside limite idade reforma ne’e PN nian, no lei hatete se Governu husu autorizasaun husi PN no PN bele autoriza ba Governu hodi prosesu lei ne’e iha nível dekretu-lei.
Tuir loloos, asuntu ne’e PN nia kna’ar maibé tanba ba lei autorizasaun lejislativa nian iha Governu haree ba importánsia kestaun ida liga ho administrasaun públika nian, presiza haree ho kuidadu ho KFP nia kompeténsia tomak ne’ebé ezekutivu iha, hanoin katak lei ida-ne’e halo de’it iha ezekutivu nian maibé tenke husu autorizasaun lejislativa husi órgaun lejislativu ne’e.
“Tanba ne’e, ohin, ami mai aprezenta pozisaun ida-ne’e, rona opiniaun Deputadu sira-nian iha komisaun A hodi hein sira halo sira-nia paréser sei aprezenta fali ba plenária mak sei halo deliberasaun ba pedidu autorizasaun lejislativa. Se autoriza, Governu sei avansa ho dekretu-lei ba fiksa idade limite ba reforma,” nia hateten.
Governante ne’e dehan, iha reforma obrigatóriu nia idade limite ne’e mak Governu aprezenta idade 60 ba reforma obrigatóriu.
Tanba, nia dehan, lei ne’ebé eziste iha administrasaun públika ba funsionáriu públiku sira laiha limite ba idade ida obrigatóriu balun tinan 60-resin ona, maibé sira lakohi atu husu reforma no serbisu nafatin,
Tanba ne’e mak Governu haree katak, ida-ne’e presiza organiza ho didi’ak tanba se lei ida la fiksa idade limite ba reforma ninian ne’e, prosesu promosaun ba karreira funsionáriu públiku no rekrutamentu ne’e estagnadu.
Tuir proposta ne’ebé aprezenta iha idade 60 tenke reforma obrigatóriu, nune’e sira-ne’ebé atinje idade reforma tenke sai no halo fali promosaun husi kraik mai no mós halo rekrutamentu, nune’e siklu promosaun ho rekrutamentu la’o ho organizadu.
Iha audiénsia ne’e, Governu mós aprezenta detallu kona-ba númeru funsionáriu idade tama ona reforma no iha trerenu rejista mós funsionáriu balun idade tama ona reforma nia kondisaun saúde ladi’ak atu mai halo serbisu hanesan ho sira seluk.
Kestaun seluk mós observa saláriu ne’ebé ho subsídiu ka renumeratóriu seluk, sira hetan durante sira ativu hela sira prefere mai serbisu nafatin mezmu mai la halo buat ida, no mai halo nafatin absensia hodi lori hetan nafatin direitu subsídiu sira-ne’ebé iha.
Situasaun sira-ne’e hotu haree atu kredebiliza setór administrasaun públika tenke hadi’a, nune’e funsionáriu sira bele halo sira-nia serbisu ho di’ak liután, halo projesaun ba karreira dezde sai hanesan ajente funsionáriu públiku ba funsionáriu permanente tuir teste eleva grau la’o iha ambiente ida saudável, dezenvolve sira-nia karreira profisionál hanesan iha funsionáriu públiku.
“Deputadu sira konkorda, mais ita hein desizaun finál iha plenária. Nune’e, hein komisaun A nia paréser depois submete ba Prezidente Parlamentu hodi ajenda ba plenária bainhira no Governu prontu atu mai diskusaun no Governu apresiza bainhira PN konkorda ba autorizasaun elaborasaun rejime ida-ne’e iha parte ezekutivu,” nia dehan.
Notísia Relevante: KFP rejista funsionáriu públiku idade reforma hamutuk 4.752
Jornalista : Nelson de Sousa
Editór : Cancio Ximenes
