NOVA IORKE, 27 setembru 2024 (TATOLI)—Pesoa eminente organizasaun internasionál g7+ no atuál Primeiru-Ministru (PM), Kay Rala Xanana Gusmão, halo diskusaun ho Prezidente Aliansa Lideransa Mundiál-Clube Madrid (WLA-CdM) kona-ba estabelesimentu kooperasaun iha futuru.
Iha enkontru ne’e, Xanana hetan akompañamentu husi Reprezentante Permanente Timor-Leste iha ONU, Dionísio da Costa Babo Soares inklui Sekretáriu Jerál g7+ Helder da Costa, iha sede Misaun Permanente Timor-Leste iha Nova Iorke.
Durante enkontru, parte rua esplora kooperasaun potensiál sira entre WLA-CdM no g7+ nu’udár organizasaun ida ne’ebé kompostu husi nasaun frajil hamutuk 20, hodi fahe esperiénsia kona-ba pás, justisa no hametin instituisaun.
Notísia relevante : Nasaun membru g7+ sira diskute pontu importante tolu iha Nova Iorke
Xanana Gusmão agradese tebes tanba diskusaun la’o di’ak, konsentradu no ko’alia liu kona-ba demokrasia iha nasaun sira g7+ inklui harii instituisaun sira ne’ebé metin iha nasaun frájil sira.
Hanesan fórum boot liu iha mundu, ne’ebé halibur antigu Xefe Estadu no Xefe Governu sira, WLA-CdM buka atu promove demokrasia no luta ba mudansa globál.
WLA-CdM harii iha tinan 2001 hanesan organizasaun ne’ebé kompostu husi membru na’in-126 husi nasaun-73, inklui Pramiadu Nobel Dame nian, antigu Xefe Estadu no Xefe Governu sira.
Objetivu husi WLA-CdM aliña ho g7+ hodi halo parseria potensiál ida-ne’ebé buka atu haburas demokrasia no estabilidade iha nasaun vulnerável sira.
WLA-CdM kontinua promove valór demokrátiku no governasaun di’ak, ne’ebé parseria ida-ne’e iha potensiál atu fó impaktu pozitivu ba ema millaun nia moris iha mundu tomak.
Enkontru amizade ne’e taka ho entrega prenda simbólika nu’udár agradesimentu ida mós husi Governu Timor-Leste.
Jornalista : Hortencio Sanchez
Editora : Julia Chatarina
