Opozisaun husu Governu selu dívida iha ospitál rai-li’ur
DILI, 01 outubru 2024 (TATOLI)—Bankada opozisaun FRETILIN iha Parlamentu Nasionál (PN), kontinua preokupa no husu ba Governu atu tau matan ba problema iha setór saúde liuliu pasiente balun tara-aan iha Hospitál Nasionál Guido Valadares no husu Governu selu dívida iha ospitál rai-li’ur.
Notísia Relevante: Pasiente ida tara aan iha haris fatin HNGV
“Ita asiste iha semana kotuk faktu sira hanesan, pasiente tara-aan iha Hospitál Nasionál Guido Valadares (HNGV), dívida sira iha ospitál rai-liur ne’ebé seidauk selu husi Governu, ai-moruk kontinua falta iha fasilidade saúde sira, insidénsia númeru mortalidade ka ema mate ne’ebé aas ba beibeik,” Deputada FRETILIN, Helena Martins, hato’o liuhusi deklarasaun polítika bankada nian iha reuniaun plenária PN, tersa ne’e.
Kona-ba pasiente ida tara-aan ne’e, bolu ema hotu nia atensaun katak ne’e problema sériu ne’ebé la devia akontese iha ospitál nasionál ida, tanba ospitál ne’e fatin atu ema hetan esperansa ba moris la’ós lakon esperansa hodi tara-aan fali.
Nia dehan, loos duni, iha kazu balun pasiente ho kondisaun ho estadiu final ona, katak ninia órgaun labele responde ba tratamentu saida de’it mak halo maibé iha ospitál nasionál rasik iha unidade Paliativu, ne’ebé tau matan ba oinsá atu akonsella no esplika ho didi’ak kondisaun moras atu nune’e família no pasiente sira bele simu realidade.
Bankada FRETILIN mós preokupa ho kargu xefia sira ba departamentu klíniku ba moras ho espesializada oin-oin, uluk dirije husi médiku espesializada sira, agora troka fali ba médiku jerál ida iha HNGV.
Bankada preokupa ho implikasaun husi dívida tratamentu médika iha rai-li’ur mak dadaun ne’e ospitál sira iha Singapura, Malázia no Indonézia halo ona notifikasaun ba Ministéiru Saúde hodi hapara tratamentu médika ba pasiente ezistente no la simu tan tratamentu pasiente foun.
“Ida-ne’e implika ba vida pasiente sira-nian. Hanesan labarik ida ho kankru ruin agora daudaun iha Malázia, presiza tratamentu mediku imidiata maibé ospital kansela tratamentu ba nia tanba seidauk selu,” nia dehan.
Bankada mós preokupa ho denúnsia públiku husi médiku señior sira kona-ba má prátika médiku neurolojista ida iha HNGV, ne’ebe destaka husi dirijente HNGV nian.
Deputadu KHUNTO, Luis Roberto, levanta preokupasaun mákina ne’ebé atu teste raan iha HNGV avária hela nune’e presiza rezolve hodi atende pasiente moras hasai raan.
Deputada CNRT, Angela Gorubelo Sarmento, reforsa katak kona-ba saúde nian lamenta tebes se buat ne’ebé opozisaun sira foti ne’e tebes duni, tanba ne’e tenke buka duni nia verasidade.
“Tanba, estrañu tebes se ospitál boot ida hanesan HNGV rame demais, seguransa metin, ema barak tama sai, no fim iha ema tara-aan ne’e estrañu, ita preokupa tebes,” nia dehan.
Nia mós husu Governu atu fó informasaun klaru ba dívida iha ospitál rai-li’ur hamutuk millaun $20 ne’e tinan ida de’it ka mai husi akumulasaun tinan barak nia laran.
Reprezentante Governu, liuhusi Sekretária Estadu Igualidade Jéneru, Elbina de Sousa, hato’o apresiasaun ba komentáriu husi Deputadu sira, no kona-ba dívida iha ospitál rai-li’ur ne’e Governu da-sia (IX) daudaun ne’e buka hela solusaun atu rezolve.
“Dívida millaun $20 ba ospitál sira iha rai-li’ur ne’e akumula husi Governu anteriór ka Governu Konstitusionál da-ualu (VIII) nian, maibé Governu da-sia komprometidu atu rezolve. Problema iha área saúde no HNGV kontribui mós mai kedas husi Governu da-ualu. Hanesan uluk ha’u hato’o ona, ami presiza tinan ida tomak atu bele rezolve sira-ne’ebé mak mai husi eransa Governu da-ualu. Tanba ne’e, ba preokupasaun área saúde, ha’u sei hato’o ba liña ministerial sira,” nia hateten.
Governu Konstitusionál da-sia ne’ebé lidera husi Primeiru-Ministru (PM), Kay Rala Xanana Xusmão, komprometidu kontinua hadi’a setór saúde hodi bele serbi povu di’ak liután.
Notísia Relevante: KM fó instrusaun ba Ministra Saúde halo levantamentu dívida ezistente iha ospitál rai-li’ur
Jornalista : Nelson de Sousa
Editór : Cancio Ximenes
