BOBONARO,02 outubru 2024 (TATOLI)-Autoridade Munisípiu Bobonaro, tersa ne’e, simu vizita kortezia husi Embaxadora Estadu Unidu Amérika (EUA), Donna An Welton, ho nia delegasaun hodi halo enkontru parseria oinsá atu rona direita problema ne’ebé Munisípiu Bobonaro enfrenta durante ne’e.
Embaxadora, hateten, EUA komprende katak Timor-Leste mós iha sidade, Munisípiu no suku sira ne’ebé mak enfrenta problema, dezafiu oioin no iha mós poténsia oioin liu-liu ba setór agrikultura.
Diplomata amerikana ne’e mós konsidera, vizita ne’e folin boot tebes tanba EUA iha kompromísiu atu inklui Munisípiu Bobonaro iha programa sira kona-ba Nutrisaun, Edukasaun no seluktan.
Notísia relevante:EUA hakarak apoia dezenvolve talentu juventude iha Timor-Leste
“Ami-nia komprimisiu ne’e ba Timor laran tomak, maibé ohin ha’u mai Señór Sekretáriu Autoridade mós ko’alia kestaun lubuk ida, tanba ne’e mak ami haree oinsá ba futuru bele inklui sira iha ami-nia programa sira hanesan Nutrisaun, Edukasaun, Empoderamentu ba Feto sira” nia hateten iha edifísiu Autoridade Munisípiu Bobonaro.
Iha biban ne’e, Sekretáriu Autoridade Munisípiu Bobonaro ba asuntu Planeamentu no Dezembolvimentu Integradu munisipál, Semedo Laco, agradese Embaxadora EUA ne’ebé bele disponiliza tempu hodi vizita no rona direita preokupasaun Munisípiu Bobonaro nian.
Iha enkontru ne’e, Autoridade Munisípiu Bobonaro relata problema kona-ba setór Agrikultura, Edukasaun, Saúde no Infraestrutura Bázika.
“Ita agradese preukupasaun sira ne’e; sua exelénsia anota hela. Sua Exelénsia mós haree rasik ho matan kondisaun atuál ne’ebé ita iha, mais ou-menus posiblidade iha futuru bele fó apoia mai Munisípiu Bobonaro,” nia tenik.
Semedo fiar katak ba futuru apoia ne’ebé EUA sei oferese bele dezembolve di’ak liután Nutrisaun Labarik sira-nian, Edukasaun no seluktan iha Munisípiu Bobonaro.
Entretantu, enkontru ne’e atu hametin liután kooperasaun di’ak ba futuru tanba EUA nu’udar parseiru di’ak Timor-Leste nian.
Notisia relevante:Ezersísiu CARAT promove kooperasaun militár F-FDTL no EUA
Jornalista: Sergio da Cruz
Editór: Rafael Ximenes de A. Belo
