KO entrega ona relatóriu ezekusaun orsamentu vizita Papa Francisco ba MF
DILI, 03 outubru 2024 (TATOLI)–Ministru Administrasaun Estatál (MAE), Tomás do Rosário Cabral, informa Governu liuhusi Komisaun Organizadora (KO) entrega ona relatóriu ezekusaun orsamentu millaun $12 ba atividade preparasaun vizita Sua Santidade Papa Francisco ba Ministériu Finansa no Kámara Konta sei halo mós auditoria ba relatóriu ne’e.
Notísia Relevante: PN seidauk simu relatóriu ezekusaun millaun $12 ba preparasaun vizita Papa Francisco
Governante esplika, aprezentasaun relatóriu ba ezekusaun orsamentu ne’e iha loron 30 nia laran, ne’e signifika katak molok 12 outubru ne’e, relatóriu ne’e tenke submete on aba Ministériu Finansa.
“Governu submete tiha ona ba iha Ministériu Finansa no sei hato’o ba iha Kámara Konta hodi halo auditoria. Ita labele hakat liu kompeténsia auditoria nian,” Ministru Administrasaun Estatál Tomás do Rosário Cabral hato’o ba jornalista sira iha Colmera.
Ministru ne’e dehan, sei iha irregularidade ruma ba iha ezekusaun orsamentu ne’e, sira sei halo rekomendasaun ida mai Komisaun organizadora, tanba iha ezekusaun orsamentu millaun $12 ne’e, rihun $80-resin mak sei fila-fali ba kofre Estadu.
Relatório ne’e mós sei aprezenta iha reuniaun Konsellu Ministru no sei disolve Komisaun organizadora ba eventu vizita amu Papa nian iha 21 dezembru 2024.
Parte igreja sei halo avaliasaun ba atividade eventu ne’e iha 23 novembru 2024, tanba Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, no Reprezentante Vatikanu iha Timor-Leste, Núnsiu Apostóliku, Monseñor Marco Sprizzi, agora daudaun iha hela rai-li’ur.
“Igreja mós sei pronúnsia ka Públika kona-ba apoiu husi Governu no setór privadu sira,” nia dehan.
Notísia Relevante: Lao Hamutuk husu Governu aprezenta relatóriu ezekusaun orsamentu ba vizita Papa Francisco
Jornalista : Jesuína Xavier
Editór : Cancio Ximenes
