DILI, 04 outubru 2024 (TATOLI)–Jestór Empreza China Harbour Timor, Lda, Jonio de Anunsiação, hateten empreza koloka ona kaixote lixu hamutuk 1022 ho medidade 1.1 kúbiku iha fatin sira iha kapital Dili, atu populasaun sira bele so’e lixu iha laran no ajuda karreta modernu raut lixu bele ba foti no fakar ba karreta laran.
Notísia Relevante: China Harbour konstrui ona fatin hatuur kaixote lixu 600-resin
Jerente ne’e hateten, empreza mós halo ona sleep ka fatin lixu nian hamutuk 311 iha kapitál ne’ebé koloka kaixote lixu husi totál 1.122 sleep ka kaixote lixu fatin.
“Itá foin halo mak sleep ka fatin kaixote lixu 311 kompleta ho kaixote lixu totál 687. Empreza mós distribui ona kaixote lixu hamutuk 335 iha 117 pontu kolesaun lahó sleep ka fatin kaixote lixu, tanba ne’e mak totál masa ka kaixote lixu ne’e hamutuk 1022. Itá sura hamutuk 687 ho 335 ne’e ita distribui ona 1022 kaixote lixu iha ho medida 1.1 kúbiku,” Jestór Empreza China Harbour Timor, Lda, Jonio de Anunsiação, hateten ba Agência Tatoli, iha Caicoli.
Jerente ne’e reforsa, empreza mós sei buka ka halo avaliasaun ba fatin foun atu koloka kaixote lixu, tuir orientasaun autoridade munisipál Dili nian.
“Fatin sira-ne’ebé foun ne’ebé ami detekta hamutuk 124 pontu no sei iha totál kaixote lixu ne’e hamutuk 266 ne’ebé atu koloka ba iha ne’ebá,” nia dehan.
“Foin daudauk ne’e tuir orientasaun husi Unidade Jestaun Projetu (PMU)-Autoridade Munisipál Dili, kontratór hala’o ona identifikasaun ba pontu kolesaun foun hamutuk 124 no presiza hodi koloka kaixote lixu hamutuk 266, inklui kaixote lixu adisionál ne’ebe mak sei aumenta ba iha pontu kolesaun sira-ne’ebe mak konsidera lixu barak hamutuk 98 pontus kolesaun,” nia dehan.
Dirijente ne’e mós lamenta ho atitude komunidade nian ne’ebé soe nafatin lixu iha rai, maske kaixote lixu sira-ne’ebé koloka ba ne’e mak mamuk.
“Komunidade haruka labarik sira ba soe, la to’o soe iha kaixote laran, entaun tenkr falar ba iha rai no sira lixu ho karosa hodi ba fakar iha rai de’it,” nia dehan.
Notísia Relevante: AMD kontrata empreza China Harbour koloka kaixote lixu 7.000 iha Dili
Jornalista : Jesuína Xavier
Editór : Cancio Ximenes
