Singapura apoia ekipamentu prátika – medikamentu ba HRM no DSMS Bobonaro
BOBONARO, 04 outubru 2024 (TATOLI)- Hafoin ensera formasaun ba profesionál saúde na’in-60 no tratamentu Tilun, Nehan ba komunidade durante loron haat, ekipa Coos medical Center husi Singapura, sesta ne’e, fó apoia ekipamentu prátika no Medikamentu ba Hospitál Referál Maliana (HRM) no Diresaun Servisu Munisipál Saúde (DSMS) Munisípiu Bobonaro hodi halo atendimentu ba pasiente sira ne’ebé moras.
Koordenadór Coos Médical Center Singapura, Dr. Chi Chiu Tan, hateten, ekipamentu no Medikamentu saúde ne’e oferese atu mellora di’ak liután atendimentu saúde ba pasiente sira iha Ospitál Referál Maliana no sentru saúde hitu iha Bobonaro.
Notísia relevante:Ekipa saúde husi Singapura sei halo tratamentu nehan-tilun iha Maliana
“Ekipamentu sira ne’e di’ak teb-tebes atu bele fasilita treinamentu ba ita-nia maluk sira. Ami hakarak Ospitál Maliana tenke sai ezemplu atu fó formasaun ba ita-nia maluk sira husi Ospitál seluk no fiar katak Medikamentu sira ne’e bele fó komunidade sira ne’ebé moras, Tilun, Nehan no seluk tan” nia hateten iha Hospitál Referál Maliana.
Iha oportunidade ne’e, Koordenadór Tan kontente no konsidera formasaun ne’e hatudu pozitivu no iha progresu di’ak tanba partisipante sira iha koñesimentu kona-ba Audiolojia no Nehan nian.
“Haree ba Ita-boot sira-nia dedikasaun servisu, vontade, ida-ne’e maka motiva ami atu tinan-tinan ami tenke esforsu, lakon tempu, prepara aan mai hamutuk ho imi beibeik iha Maliana atu fó atensaun ba ita-nia populasaun iha rai ida ne’e,” Dr Chi Chiu Tan akresenta.
Diretór Ezekutivu HRM, José Marsal da Cruz, esklarese ekipamentu hirak ne’e utiliza ba prátika, ekipamentu USG (ultrasonogafia, sigla inglés) leno Inan isin-rua, ekipamentu audiolojia ka Tilun nian no Nehan, Dasin Tetu-Labarik nia inklui Medikamentu sira hanesan Ai-moruk, Tilun, Nehan no Konsumível.
“Ne’e para servisu ne’ebé sira fó treinamentu ne’e iha sustentabilidade, no ekipamentu sira ne’e partisipantes ne’ebé treinadu di’ak atu bele apoia sira-nia programa Training of Trainer (TOT) no hili médiku nain rua atu ajuda sira tulun ita-nia pasiente ne’ebé horbainhira simu tiha Audio, tanba durante ne’e laiha ema ida mak atu troka batéria no aparellu seluk ba ekipamentu Tilun nia,” José Marsal da Cruz haktuir.
Iha biban ne’e Da Cruz, orgullu tanba ekipa Coos Médical Center Singapura bele hili Ospitál Referál Maliana sai modelu ida atu fó formasaun ba profesionál saúde iha Ospitál no Sentru Saúde sira husi Munisípiu seluk.
José Marsal da Cruz mós agradese ba parseiru ne’e tanba voluntariamente bele apoia ona ekipamentu ho Medikamentu no hasa’e kapasidade rekursu umanu HRM nia liuhusi Formasaun Kardiaku, Tilun, Nehan, Enfermajen, Parteira no seluktan.
“Sira avalia ita-nia lakunas ho Frakeza sira iha ne’e, balun ita susesu balun ita seidauk bele, entaun Coos Singapura mai hasa’e ita-nia koñesimentu kona-ba Jantung (fuan), Tilun, Nehan ne’ebé mak ita sei menus tebes rekursu umanu atu bele apoia komunidade sira. Ita mós menus ai-moruk ho ekipamentu sira ” José Mersal da Cruz rekoñese.
Nune’e mós, Diretór Servisu Munisipál Bobonaro, Gil Bernardo Vicente, agradese no fiar ba futuru ekipa Coos Medical Center Singapura sei kontinua fasilita formasaun ba profesionál saúde sira.
Gil Bernardo kompromete sei kuidadu ekipamentu prátika hodi uza ba tempu naruk. “Ha’u husu ba kolega sira ne’ebé hetan ona formasaun atu aplika nafatin matéria ne’ebé hetan durante ne’e hodi bele halo atendimentu ba ita-nia komunidade ne’ebé presiza ita-nia tulun,” Gil konklui.
Tuir planu, iha fulan-setembru ka outubru 2025 ekipa Coos Medical Center Singapura sei mai fali Hospitál Referál Maliana atu kontinua fó formasaun no halo atendimentu Tilun, Nehan ba komunidade sira.
Enkuantu Profesionál Saúde ne’ebé Partisipa iha programa formasaun ne’e mai husi Sentru Saúde sira iha Munisípiu Bobonaro, HRM, Hospitál Referál Maubesi no Suai.
Notisia relevante:SNAEM, I.P fó formasaun atendimentu emerjénsia ba ekipa ambulánsia HRM
Jornalista: Sergio da Cruz
Editór: Rafael Ximenes de A. Belo
