BOBONARO,03 outubru 2024 (TATOLI)-Kestaun tempu de’it, lais ka kle’ur, tempu-badak aldeia tolu iha Munisípiu ne’ebé besik ho fronteira Terrestre Indonézia, sei hetan roman eletrisidade nian.
Aldeia tolu ne’e mak hanesan Mahui, Daitete no Riti-udu, iha suku Ritabou, Postu administrativu Maliana, Munisípiu Bobonaro. Razaun, tanba daudaun ne’e, Projetu Eletrifikasaun Komunitária (PEK) ne’ebé implementa hosi Eletrisidade Timor-Leste, Empreza Públika (EDTL, EP) ho Komunidade besik finaliza ona.
Xefe Aldeia Mahui, suku Ritabou, Romeo Mau, konfirma katak projetu ne’e implementa iha fulan-abríl liubá no daudaun ne’e ninia progresu fíziku to’o faze dada liña husi aldeia ida ba aldeia seluk.
“Agora ami komesa ona dada fiu atu tula ba besi. Depois dada ba uma-uma, hein katak iha tempu-besik ne’e ahi bele lakan ona,” Autoridade lokál ne’e informa Jornalista TATOLI, iha terrenu, kuarta ne’e
Notísia relevante:Aldeia tolu iha Ritabou kada família kontribui $100 dada rasik liña elétrika
Xefe Aldeia ne’e demostra nia sentimentu kontente no entuziasmu tebes atu asesu liña no roman eletrisidade nian tanba hahú tempu okupasaun Indonézia iha territóriu, iha sira-nia aldeia hela de’it iha nakukun laran.
“Ita atu uza materiál elektrónika sira hanesan televizaun, jelera no seluktán, ne’e labele kestaun tanba ahi laiha. Agora iha ona, ema hotu-hotu bele asesu ba ida-ne’e,” nia ko’alia ho otimista.
Ho liña eletrisidade ne’ebé hahú tama daudaun, Julio Verdiál Barros, veteranu ida ho naran kódigu “Lian ba oin” sente kontente no orgullu tanba mehi komunidade nian atu asesu eletrisidade durante tinan-20 resin nia laran besik atinje ona.
Eis-gerilleiru no kombatente ba luta libertasaun nasionál ne’e hatutan, komunidade sira servisu voluntariamente tanba hakarak sente dezenvolvimentu hanesan aldeia no suku balun ne’ebé iha munisípiu seluk.
Antigu ‘liman-kro’at’ povu nian ne’e salienta, durante ne’e komunidade balun uza de’it Solár Panel no balun na’in dada rasik enerjia elétrika.
“Iha 2019 ne’e, povu tuur hamutuk na’in-10 to’o 20 kontribui osan kada uma $100 sosa Fiu hodi liga rasik ahi ne’e dada mai ida-idak nia uma,to’o ikus mai EDTL mai konsulta ho ita-nia autoridade lokál, povu, EDTL fornese materiál ho Tékniku, povu kontribui servisu apoia sira, ke’e rai-ku’ak, lalin besi-riin no dada fiu, ne’e voluntariamente povu nia atu kontribui ba dezenvolvimentu hodi apoia governu, atu hadi’a ita-nia rai no ita-nia nasaun,” nia reitera.
Iha terrenu, Jornalista TATOLI nota no konfirma katak abitante sira – foinsa’e, katuas, ho entuziasmu, dedika sira-nia aan, oferese sira-nia tempu no enerjia hodi apoia EDTL, hodi dada fiu eletrisidade nian, nune’e aselera lalais serbisu ne’ebé mak iha.
Entretantu, bainhira PEK ne’e finaliza sei fórnese enerjia elétrika ba uma-kain rihun ida-resin.
Notisia relevante:Projetu eletrifikasaun ba aldeia tolu iha Ritabou paradu
Jornalista: Sergio da Cruz
Editór: Rafael Ximenes de A. Belo
