DILI, 07 outubru 2024 (TATOLI)–Diretór Servisu Munisipál Apoiu Organizasaun Naun Governamentál no organizasaun Komunitária iha Autoridade Munisípiu Dili (AMD), Gaspar da Silva, hateten 60% husi suku 31 iha munisipiu Dili sei partispa kompetisaun suku limpu hodi komemora Dili Day ba da-255.
Notísia Relevante: Governu lansa kompetisaun “Dili Hamurak” komemora “Dili Day” ba da-255
Nia esplika, ida-ne’e hodi haree kona-ba rekezitu sira hanesan redusaun instabilidade, oinsá papel autoridade sira hodi ko’alia ba komunidade soe lixu ba lixeiru sira, tasi-ibun moos ka kuda ai-horis iha uma no hamoos baleta besik uma sira no ekipa juri sei avalia no fó valór.
“Suku sira-ne’ebé partisipa iha kompetisaun iha ne’e ita dehan 60% mak partisipa iha kompetisaun ne’e, bazeia mós ba iha sirkulár Prezidente Autoridade Munisipal hodi halo duni limpeza iha kada sesta-feira, maibé restante suku sira-ne’e hein orientasaun,” Nia hateten ba Agência Tatoli, iha Matadoru, segunda ne’e.
Gaspar da Silva hateten, ekipa halo monitorizasaun no avalia ona suku sira-ne’e hodi haree rekezitu sira-ne’ebé ekipa juri lansa hodi sai vensedór ba kompetisaun ne’e.
“Ami iha membru ema na’in-20 ne’ebé envolve mós husi parseiru sira-ne’ebé fó apoiu Federal Insurance no Westeren Union ha’u rasik lidera no tun diretamente ba suku sira hodi monitoriza no avalia suku sira-ne’e. Ami informa sira kona-ba kompetisaun, depois mak tun haree diremente ba asaun liuhusi moto Dili HAMURAK,” nia dehan.
Iha fatin hanesan, Kordenador ba Kompetisaun Múzika Dili HAMURAK, Leo Moniz, hateten kompetisaun ba hakerek múzika koona-ba Dili HAMURAK ba selebrasaun Dili Day ba da-225 nian ne’e, sidadaun nia partisipasaun ba kompetisaun ne’e menus liu.
“Entuziasmu mak menus. Sí ida de’it mak konsege telefone no husu informasaun kona-ba objetivu hodi kompete no preinxe rekezitu, entaun ikus mai sai manán-na’in ba kompetisaun ne’e,” nia dehan.
Nia dehan, ema barak mak hakarak konkorre maibé sira liu tiha loron ba kompetisaun mak hatama sira-nia obra hakerek ne’e, entaun sira la prienxe rekezitu ida kona-ba loron determinadu ba iha kompetisaun ne’e.
“Sira-ne’ebé rona ikus ka tarde rona informasaun ne’e ema hamutuk 10-resin, entaun ami tuur hamutuk deside ida hatama tuir tempu no prienxe rekezitu mak sai manán-na’in,” nia dehan.
Iha mos kompetisaun Tik Tok ba sidadaun sira iha suku sira iha munisipiu Dili hodi hato’o mensajen kona-ba Dili HAMURAK.
Kompetisaun sira-ne’e hodi garante Dili HAMURAK (Dili Hakmatek, Moos no Furak) no rezultadu ba iha kompetisaun sira-ne’e sei fó sai iha loron 10 outubru 2024, iha loron komemorasaun Dili Day ba da-255 ne’e.
Notísia Relevante: AMD komemora Dili Day ba da-255 ho atividade feira-karavana kulturál
Jornalista : Jesuína Xavier
Editór : Cancio Ximenes
