OÉ-CUSSE, 07 Outubru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, husu ba funsionáriu sira atu banati tuir espíritu luta-na’in no eroi sira-nian atu hametin patritizmu no nasionalizmu hodi hatuur komportamentu di’ak iha serbisu fatin no kontribui ba prosesu dezenvolvimentu.
Eis-Komandante FALINTIL ne’e hato’o nia mensajén ofisiál iha serimónia isár bandeira nasionál semana dahuluk fulan-Outubru 2024, iha kampu futeból Oébau, ohin.
Notísia relevante: Ministru Francisco Guterres husu Oé-Cusse oan promove pás-estabilidade
“Mumentu ida-ne’e atu hametin ita-nia patriotizmu, nasionlizmu. Pátriotizmu ne’e katak ita prontu atu halo sakrifisíu tomak mezmu liuhusi fó ita-nia vida atu defende ita-nia pátria no nasionalizmu katak ita tenke tuir nafatinsira-nia ain fatin ne’ebé ita nia bei-ala, asu’ain sira-ne’ebé husik hela mai ita, defende nafatin ukun rasik-aan ba Timor-Leste”, Rogério Lobato dehan iha isár bandeira ne’e.
Nia dehan patriotizmu bele hametin liuhusi komportamentu, bainhira funsionáriu Estadu ida serbisu ho laran tomak no tama ho oras, serbisu iha kompromisu ba nia rain, ho onestidade, no serbisu ho prontidaun. “La’ós ita bá serbisu fatin invézde ita serbisu, ita uza mak telephone hodi haree youtube no halo tiktok. Ne’e la’ós atividade atu halo iha serbisu laran bainhira ita hanesan funsionáriu Estadu”, nia fó hanoin.
Notísia relevante: Funsionáriu tenke hatudu disiplina no responsabilidade iha serbisu fatin
Nia fundamenta katak funsionáriu Estadu oioin ne’ebé serbisu iha edifísiu públiku no sira-ne’ebé ka’er kilat hanesan seguransa, diferente iha tarrefa serbisu, maibé kumpre nafatin nasionlizmu no patriotizmu.
“Ha’u apela ba maun-alin sira hotu, ne’ebé ohin hamutuk iha isár bandeira ne’e. Hanoin nafatin ita-nia mártir sira no asu’ain sira. Buat ne’ebé sira halo boot tebes. Ita kuandu fó ita-nia vida ba ukun rasik-aan, ita mate atu defende independénsia ne’e, tan ne’e kontinua tuir sira-nia ezemplu”, nia apela.
Eis-Ministru Interiór ne’e salienta katak serimónia isar bendera hotu-hotu kanta inu nasionál Pátria, “liafuan ida-ne’e iha signifikadu boot tebes. Bainhira ita hasa’e bandera ne’e ita hasa’e ita-nia símbolu nasionál. Bandeira nasionál ne’e símbolu povu tomak Timor-Leste nian ho ita-nia pátria”, nia afirma.
Nia mós esplika razaun kada fulan ida halo serimónia hasa’e bandeira nasionál nu’udar reflesaun ba sidadaun hotu atu hanoin bá iha kotuk oinsá mak Timor-Leste manán ukun rasik-aan.
Tanba bandeira nasionál ne’e, laiha ema ida mak oferese gratuita, maibé povu Timór mak hadau de’it liuhusi funu naruk ho mate rihun, fakar raan nlo halo sakrifísiu boot liu.
Jornalista: Abílio Elo Nini
Editora: Maria Auxiliadora