OÉ-CUSSE, 08 Outubru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, informa ezekusaun Orsamentu Jerál Estadu (OJE) 2024 ba Oé-Cusse to’o Outubru ne’e foin atinje 38%, tanba projetu barak seidauk halo pagamentu.
“Ita-nia ezekusaun foin 38%, maibé sei sa’e liután tanba ita halo ona verifikasaun liuhusi ADN ba projetu barak ne’ebé seidauk selu. Ha’u hato’o ona despaixu atu halo pagamentu. Molok tinan ne’e hotu, ita-nia ezekusaun ne’e bele sa’e to’o 60%”, Rogério Lobato hateten iha Oé-Cusse.
Notísia relevante: OJE 2024, RAEOA seidauk ezekuta kapitál menór no kapitál dezenvolvimentu
Rogério Lobato salienta katak orsamentu RAEOA nian ho millaun $60 ne’e maioria selu tusan sira-ne’ebé antigu autoridade sira husik hela.
“Tanba osan ne’ebé ami simu ne’e atu selu tusan de’it. Sira anteriór husik tusan barak, maibé ami atu selu tusan sira-ne’e ho presu justu. Ami tenke verifika progresu serbisu ba kada projetu, entaun tenke tuun bá terrenu hamutuk ho ADN atu haree didi’ak”, nia afirma.
Lembra katak orsamentu RAEOA ho montante millaun $60 ne’e – $40 aloka ba RAEOA no $20 ba Fundu Espesiál Dezenvolvimentu (FED). Husi millaun $40 ne’e prevee ba saláriu no vensimentu $14,351.592, bens no servisu $11,090.833, transferénsia públika $4,307.575, kapitál menór rihun $350 no kapitál dezenvolvimentu $9.900.
Millaun $20 ba FED aloka ba saláriu no vensimentu $598.198, bens no servisu $9,930.614, transferénsia públika $2,871.110 no kapitál dezenvolvimentu $6,600.002.
Notísia relevante: Trimestre dahuluk: Komisaun C konsidera ezekusaun OJE 2024 husi RAEOA sei kiik
Jornalista: Abílio Elo Nini
Editora: Maria Auxiliadora