DILI, 08 outubru 2024 (TATOLI)–Jestór Empreza China Harbour Timor, Lda, Jonio de Anunsiação, hateten komunidade impeder empreza China Harbour konstrui sleep ka lixeira iha bairu sira iha Dili laran, hodi hatuur kaixote lixu atu komunidade bele fakar lixu iha laran.
Notisia Relevante: AMD kontrata empreza China Harbour koloka kaixote lixu 7.000 iha Dili
Nia esplika, atu rezolve problema sira=ne’e presiza halo ona komunikasaun ho Autoridade Munisipál Dili no autoridade lokál sira, oinsá bele fó fatin ba empreza hodi harii sleep ba komunidade atu bele fakar lixu iha kaixite lixu ne’e.
“Fatin balun ita konsege halo no fatin balun komunidade la hatan atu hal. Tanba ne’e mak ohin dehan impendimentu. Maibé, ida-ne’e ninia xave iha autoridade tenke ajuda rezolve pontu ka fatin sira-ne’ebé sai fatin konflitu,” Jestór Empreza China Harbour Timor Lda, Jonio de Anunsiação, hateten ba Agência Tatoli, iha Caicoli, tersa ne’e.
Jestór ne’e hateten, kaixote lixu sira-n’e seidauk distribui hotu, tanba sleep atu tau kaixote lixu seidauk prontu, kaixote lixu iha kúbiku ualu (8) no 20, no mós iha 1.1 kúbiku metál ne’ebé sei rai Caicoli no Portu Dili.
Iha sorin seluk, Prezidente Interinu Autoridade Munisipál Dili (AMD), Francisco dos Santos, dehan AMD buka fali espasu sira-ne’ebé bele konstrui sleep, tanba pontu sira-ne’ebé sira hili ne’e okupa fali ema-nia uma oin no haris fatin.
Francisco dos Santos rekoñese, situasaun ne’e prejudika ba empreza nia serbisu, AMD kontinua halo aproximasaun ho komunidade no autoridade lokál.
“Ekipa AMD nian sei halo hela aproximasaun ho autoridade lokal oinsá buka fatin ba ida-ne’e. Agora prosesu la’o hela oinsá sira bele iha konxiénsia to’o tempu ida fó espasu atu halo kaixote lixu fatin atu sira rasik mak sei uza. Nune’e mós, ita tenke buka espasu públiku hodi bele harii sleep,” nia hateten.
Nia hateten, mapeamentu ne’ebé empreza aprezenta anteriormente kona-ba pontu ba kolesaun ne’e la koresponde ba iha kondisaun reál ema-nian.
Notisia Relevante: China Harbour koloka ona kaixote lixu 1022 iha kapitál Dili
Jornalista : Jesuína Xavier
Editór : Cancio Ximenes
