MUTL husu PR Horta veta proposta orsamentu privativu PN sosa viatura
DILI, 08 setembru 2024 (TATOLI)–Movimentu Universitáriu Timor-Leste (MUTL) husu ba Deputadu IV lejislatura iha Parlamentu Nasionál (PN) hodi revee ho konsiénsia ba proposta orsamentu privativu Parlamentu Nasionál atu sosa viatura foun ho montante millaun $4-resin iha Orsamentu Jerál Estadu 2025.
Notísia Relevante: Proposta orsamentu privativu 2025 sei sosa karreta ba deputadu 65
Portavós Movimentu Universitáriu Timor-Leste (MUTL), Cristiano José Trindade, husu ba Prezidente Repúblika (PR), José Ramos Horta, atu konsidera ezijensia MUTL nian hodi kansela ka veta proposta lei ne’ebé Parlamentu Nasionál aprova hodi sosa karreta ba deputadu sira iha Parlamentu Nasionál.
“Husu ba Prezidente Repúblika atu veta ka kansela lei ne’ebé ba ema-ne’ebé fó bokur ka grupu balun de’it, maibé la’ós interrese povu nian,” Portavós MUTL, Cristiano José Trindade, hato’o ba jornalista sira liuhusi konferénsia imprensa, iha Jardin 5 de Maio, Colmera, tersa ne’e.
Bainhira deputadu sira no Prezidente Repúblika la tau konsiderasaun ba sira-nia ezijénsia atu kansela proposta lei kona-ba sosa karreta foun ba membru parlamentar, MUTL sei ezije Prezidente Repúblika no halo asaun greve ka demostrasaun hasoru Deputadu sira.
Razaun, nai dehan, problema sosiál iha nasaun ne’e konpleksu tebe-tebes hanesan problema edukasaun, saúde no agrikultura kontinua eziste ne’ebé Governu seidauk bele rezolve atu hadi’a povu nia moris.
“Husu atu anula ka kansela fila-fali proposta lei nú. 4 viatura no transporte ba deputadu sira atu sosa karreta foun ba deputadu sira-ne’ebé mak vota ho maória absoluta tiha ona iha loron 18 setembru 2024 ho konsiénsia,” portavós MUTL, Cristiano José Trindade, hato’o ba jornalista sira liuhusi konferénsia imprensa, iha Jardin 5 de Maio, Colmera, tersa ne’e.
Nia apela, ho konsiénsia atu Deputadu sira uza sira-nia saláriu ne’ebé simu kada fulan ida liu rihun $2 no balun liu rihun $4 hodi sosa karreta ba sira-nia aan, tanba iha direitu prerogativu ba osan ba transporte, saúde no seluk tan “la’ós esplora povu nia osan no uza povu nia osan la tuir povu ninia hakarak”.
Iha fatin hanesan, segunda portavós MUTL, Amino Lunturu, kestiona tanba saida deputadu sira tenke sosa karreta foun, bainhira karreta sira-ne’ebé uza sei di’ak.
Tanba, nai dehan, povu Timor-Leste terus liu tinan 20 ona no sei enfrenta iha problema edukasaun no agrikultura, no ema hotu hatene investimentu ba iha petróleu sei hotu tanba mina maran.
“Tanbasá la fó prioridade ba nesesidade báziku ba povu ba setór sira hanesan saúde, menus ai-moruk, edukasaun hakdasak no povu halerik ba Estrada, ita ba gasta osan boot sosa karreta luxu ba ema no grupu kiik-oan ida-ne’ebé mak povu rasik depozita nia konfiansa,” nia hateten.
Tanba ne’e, MUTL mós husu ba povu ka sidadaun hotu-hotu atu kontra desizaun na’ok, esplorasaun no korrupsaun legál ne’ebé reprezentante povu iha Parlamentu Nasionál halo atu bele salva futuru nasaun nian.
Notísia Relevante: Horta: La nesesáriu sosa viatura ho folin karun ba deputadu sira
Jornalista : Jesuína Xavier
Editór : Cancio Ximenes
