DILI, 09 outubru 2024 (TATOLI)—Ekipa responsável husi Banku Nasionál Komérsiu Timor-Leste (BNCTL, sigla portugés) ho akompañamentu husi Institutu Nasionál Seguransa Sosiál (INSS) fasilita pagamentu to’o rezidénsia ba benefisiáriu pensaun sosiál ne’ebé ho kondisaun moras no labele halo movimentu.
“Tempu pagamentu ita-nia ekipa BNCTL ne’ebé halo pagamentu fó tempu semana rua na ba ita-nia ferik-katuas ne’ebé labele la’o no moras iha hela. Iha ne’ebé mak Ministériu Solidaridade Sosiál no Inkluzaun (MSSI) munisipál mak simu deklarasaun husi xefe suku sira no iha tempu semana rua ne’e BNCTL halo pagamentu direita ba sira-nia uma,” Prezidente INSS, Arlindo Pinto, relata ba Agência Tatoli hafoin entrega motorizada ba koordenadór INSS destakadu iha munisípiu iha edifísiu INSS, Caicoli, kuarta ne’e.
Notísia relevante : Autoridade Viqueque husu INSS-BNCTL hadi’a sistema pagamentu subsídiu ba idozu
Nia klarifika, kona-ba informasaun ne’ebé sidadaun balun halo virál, BNCTL halo akordu hamutuk ho INSS nune’e faze dahuluk halo konferénsia imprensa ida hodi alerta ba públiku inklui fó informasaun jerál ba autoridade lokál kona-ba ferik-katuas ne’ebé moras atu hein pagamentu iha sira-nia uma rasik.
“Ita-nia ferik-katuas ne’ebé moras no labele la’o, depois banku direita iha uma maibé realidade kada faze pagamentu, ita-nia benefisiáriu sempre obriga nia família hodi lori direitamente ba sentru pagamentu iha suku sira. Entaun ida-ne’e ita labele fó sala ba autoridade suku, BNCTL, ka INSS,” nia esplika.
Tanba ne’e, Prezidente INSS husu atu benefisiáriu ne’ebé moras labele la’o, hein iha uma bainhira pagamentu normál ramata, BNCTL sei to’o iha benefisiáriu nia uma hodi halo pagamentu.
Ekipa sira hahú ona pagamentu faze daruak ba idozu no invalidez, hahú loron 16 setembru to’o 10 outubru.
Benefisiáriu hamutuk 104.000 mak sei simu pensaun sosiál iha faze daruak, ho totál pagamentu millaun $21.
“Pagamentu faze daruak ba ita-nia idozu invalidez ne’e hahú tiha ona iha loron 16 setembru, prosesu hotu la’o hela no segunda semana ne’e ita-nia ekipa ho BNCTL iha munisípiu Lautém no parte leste nian hotu ona,” nia infoema.
Idozu ho tinan-60 to’o 69 sei simu $60 kada fulan ho totál benefisiáriu 28.896, benefisiáriu ho tinan 70 to’o 79 sei simu $80 kada fulan ho totál benefisiáriu 44.045, benefisiáriu ho tinan 80 ba leten sei simu $100 kada fulan ho totál 15.978.
Benefisiáriu pensaun sosiál ferik-katuas no ema ho defisiénsia ne’ebé sei simu pagamentu liuhusi BNCTL hamutuk 97.139, Banco Nacional Ultramarino (BNU) 222, Bank Republik Indonézia (BRI) 226 no Banku Mandiri 57.
Benefisiáriu ne’ebé iha ona konta bankária liuhosi Automated Teller Machine (ATM) P24 hamutuk 15.249 no benefisiáriu ne’ebé simu pagamentu ho konta bankária direta hamutuk 82.395.
Jornalista : Osória Marques
Editora : Julia Chatarina
