VIQUEQUE, 07 outubru 2024 (TATOLI)- Xefe suku Afaloikai, postu Uatulari, munisípiu Viqueque, Cesario N. Pires, rekomenda ba Governu liuhusi Institutu Nasionál Seguransa Sosiál (INSS) atu hadi’a sistema pagamentu subsídiu ba idozu ho idade avansadu sira-ne’ebé la’o labele atu bele simu iha uma.
“Ha’u nu’udar autoridade hakarak rekomenda ba Governu se bele hadi’a sistema pagamentu hanesan idozu ne’ebé la’o labele reprezenta família simu subsídiu, hafoin entrega ba benifísiariu”, Xefe Suku ne’e hateten ba jornalista sira, iha postu Viqueque vila, ohin.
Husu mos INSS NO BNCTL atu bele atribui pagamentu subsídiu nia ba familia idozu-nia tanba benifisiáriu sira moras no labele mai iha sede suku.
“INSS no BNCTL dehan idozu sira-ne’ebé moras no la’o labele, sira mak ba pagamentu direta iha idozu sira-nia uma, maibé la realiza to’o agora. Nune’e foin lalais ne’e idozu sira ne’ebé la’o labele, ami tenke lori ba fatin pagamentu foin bele simu osan”, nia lamenta.
Hanesan pagamentu foin lalais ne’e nia dehan, idozu husi suku Afaloikai ne’ebé la’o labele no moras hamutuk na’in-50 la simu diretu subsídiu ba faze datoluk. Iha idozu na’in-haat mak konsege simu tanba família sira tula bá to’o iha sede suku hafoin simu subsídiu.
Enkuantu, Tuir dadús idozu no invadu husi suku Afaloikai ba tinan 2024 ne’ebé asesu ba subsídiu pagamentu faze datuluk na’in-611. Husi númeru ne’e idozu na’in-50 la simu diretu subsídiu.
Iha fatin ketak, Xefe suku Irabin de Baixo, José Baptista do Carmo, relata, suku Irbin de Baixo idozu sira-ne’ebe la’o labele no moras na’in-30, labele simu sira-nia diretu, hafoin INSS promete semana rua maka mai fali suku hodi halo pagamentu, maibé seidauk mai halo pagamentu.
“Ita kompara ba tinan uluk idozu sira-ne’ebé la’o labele ne’e família sira bele reprezenta hodi simu idozu sira-nia subsídiu, maibé ba tinan ida-ne’e labele. Tanba ne’e, ami rekomenda INSS oinsa haree sistema hodi hadi’a no mós haree idozu sira-nia naran iha ona, maibé tinan ida-ne’e lakon fali”. Tenik nia
Jornalista : Vitorino Lopes da Costa
Editór : Florencio Miranda Ximenes
