OÉ-CUSSE, 10 Outubru 2024 (TATOLI) – Komisaun Nasionál Eleisaun (CNE, sigla portugés) introdús Lei Eleisaun Munisipál iha suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) hodi prepara ba Eleisaun Asembleia Munisipál, ne’ebé tuir planu sei akontese iha 2025 no 2026.
Edukasaun sívika ne’e ho tema ‘Hamutuk konsolida demokrasia no eleisaun ba podér lokál partisipativu no inkluzivu’ hodi promove partisipasaun inklusiva iha eleisaun munisipál.
“Edukasaun sívika ne’e responsabilidade nu’udar sidadaun ida, oinsá bele iha estabilidade no unidade, liuliu preparasaun ba eleisaun munisipál ne’ebé sei mai. Entaun, eleisaun atu mai ho di’ak, entre ita ho ita mak tenke iha pás no estabilidade ho informasaun ne’ebé klara”, Prezidente CNE, José Agostinho Belo, dehan iha salaun Parókia Padiae, ohin.
Notísia relevante: CNE prepara matéria edukasaun sívika ba eleisaun munisipál
Nia dehan nu’udar Prezidente CNE hamutuk ho komisáriu sira apoia edukasaun sívika ne’e ba komunidade no persiza halo esplikasaun ne’ebé klara ba kualkér tipu eleisaun no mekanizmu atu realiza sufrájiu.
“Maibé eleisaun munisipál ne’e sei ba liu ema Oé-Cusse oan sira atu hili nia líder, prezidente kámara no deputadu. Tanba ne’e, sira tenke hatene didi’ak esplikasaun no responsabilidade, karik eleisaun sei mai, sira bele preparadu hodi partisipa”, nia hateten.
Prezidente ne’e salienta katak lei kona-ba eleisaun munisipál oras ne’e iha ona no daudaun Governu halo hela tranzisaun ho Prezidente Autoridade sira-ne’ebé iha ona, sira iha papél boot atu prepara eleisaun sira ne’ebé sei mai.
“Agora, CNE nia hanoin oinsá sosializa informasaun atu ema iha hanoin katak eleisaun mai ne’e nia karáter diferente ho eleisaun jerál sira hanesan prezidensiál atu labele baruk, tanba la’ós hili de’it deputada iha nasionál, maibé sei hili mós Oé-Cusse atu lidera rasik Oé-Cusse liuhusi eleisaun munisipál”, nia adianta.
Notísia relevante: CNE konsege elabora matéria edukasaun sívika hamutuk 11 ba eleisaun
Iha fatin hanesan, xefe suku Lalisuk, Hermenegildo Lalisuk, agradese ba prezensa CNE tanba hili suku ne’e hodi halo edukasaun sívika.
“Atu hakat bá eleisaun munisipál, primeiru mak ne’e, ha’u husu tenke hadi’a dadus, atu hatene loloos eleitór hira mak sei vota, nia sistema biométriku ne’e di’ak, ita hatudu de’it naran sai, nune’e laiha manipulasaun iha votasaun. Ne’ebé dadus ne’e tenke hadi’a ho loos. Agora, ema mate no moris sira-nia dadus barak mak seidauk hamoos husi sistema iha nasionál, ne’ebé persiza hadi’a uluk ne’e”, nia sujere.
Jornalista: Abílio Elo Nini
Editora: Maria Auxiliadora
