BOBONARO,09 outubru 2024 (TATOLI) – Ezekusaun Orsamentu Jerál Estadu (OJE) tinan fiskál 2024 hahú husi fulan-janeiru to’o setembru, Autoridade munisipál Bobonaro ezekuta 5,592,802.33 korresponde ba (74%) husi totál alokasaun anuál $9,270,244.00.
Progresu Ezekusaun Orsamentu ba kategoria lima hanesan; saláriu no vensimentu $1,913,760.00, ezekuta ona $1,335,514.66 (70%) balansu $578,245,34, kategoria bens no servisu $905,686.00, ezekuta ona $566,850.33 (81%) balansu $147,610.86.
Tranferénsia públika alokasaun anuál $3,551,713.00, gasta $2,348.54 (66%), balansu hela $1,203,413, Kapitál Menór alokasaun anuál $370,798.00,gastu $5,250.00 (34%) balansu $261,040.00 no kapitál dezenvolvimentu alokasaun $2,528,287.00, ezekuta ona $1,274.004 (93%), balansu $24,840,21.
Sekretáriu Autoridade Munisípiu Bobonaro ba Asuntu Planeamentu no Dezenvolvimentu Integradu Munisipál, Semedo Laco, esplika, husi totál kategoria lima ne’e persentajen ki’ik liu mak kapitál menór no ninia ezekusaun la’o tarde tanba akizisaun ba materiál eletróniku no mobiliáriu suku sei iha prosesu nia laran.
Tuir portál transparénsia Ministériu Finansa nian hatudu katak, ezekusaun iha kapitál menór foin atinje 21.2% hosi totál orsamentu $370,798.00, ezekuta ona $5,250.00, saldo hela $275,040.00.
Notísia relevante: PAM Bobonaro lansa projetu PDIM 2024
“Ita nia parte aprovizionamentu halo ona akizisaun materiál informátika ba suku sira, agora ninia prosesu la’o hela, sasán ne’e mai iha tempu badak ninia ezekusaun bele sa’e maka’as kedas ona,” nia aprezenta iha enkontru konsellu konsultivu munisípiu Bobonaro, iha salaun Maria-Tapo, tersa ne’e.
Semedo fundamenta, orsamentu ba kategoria kapitál dezenvolvimentu ninia prosesu ezekusaun boot liu ho totál 93% tanba halo ona pagamentu entre $25,50%, 75% to’o $100 ba kompañia ne’ebé kaer projetu Planu Integradu Munisipál (PDIM) 13.
Projetu PDIM hirak-ne’e mak hanesan; konstrusaun bee-moos sistema gravitasaun iha Tasmil, Lontas ne’ebé ezekuta husi kompañia Manhmurlaku Unip Lda ho totál kustu $72,586.45, daudaun ne’e progresu fíziku atinje ona 74%, konstrusaun merkadu Marco Cailaco implementa husi Zavia Unip Lda ho kustu $78,866,57 ne’ebé dadaun ne’e atinje ona 98%.
Konstrusaun sala tolu eskola Dom Samara, Balibó implementa husi Mila Unip Lda ho kustu $104,710,97 ne’ebé daudaun ne’e progresu atinje ona 77%, konstrusaun edifísiu SMASA responsabiliza husi Kompañia Regenciv Unip Lda ho kustu $132,297.90, ne’ebé dadaun ne’e atinje ona 65%, konstrusaun bee-moos iha aldeia Oelaka no Boutál Deudet ezekuta husi Idele Unip Lda ho kustu $134,882,87 no daudaun ne’e progresu fíziku atinje ona 77%.
Kontinuasaun konstrusaun merkadu Maumali implementa husi Lesuburo Unip Lda $184,718.13, ne’ebé dadaun ne’e atinje ona 50%, reablitasaun rezidénsia pouzada Maliana ezekuta husi kompañia Lombel Unip Lda ho kustu $193,113.26 ne’ebé dadaun ne’e atinje ona 63%.
Konstrusaun edifísiu Diresaun Agrikultura Munisípiu Bobonaro ezekuta husi kompañia Rilmar Unip Lda ho kustu $195,821.73 ne’ebé daudaun ne’e servisu fíziku atinje ona 58%.
Konstrusaun irrigasaun Raegeren to’o Raboanan ho kilómetru tolu, ezekuta husi Kompañia Irmão Sandobe Unip Lda ho kustu $207,270.65, daudaun ne’e atinje ona 65%, konstrusaun Postu saúde no Rezidensia Pesoál Saúde iha Suku Molop ezekuta husi Kompañia Senizu Unip Lda ho kustu $217,666.38, konstrusaun satan mota Bauriku EBC Koelima ezekuta husi kompañia Balibó Furak Unip Lda ho kustu $218,609.46, dadaun ne’e atinje ona 100%, entrega ona ba autoridade munisípiu Bobonaro.
Konstrusaun barreira satan Mota Maumela I iha Cailaco ezekuta husi kompañia Ely Karya Unip Lda ho kustu $234,251.08 no daudaun ne’e atinje ona 48%, ikus liu projetu reabilitasaun estrada Ai-Asa, Mazop, Laho ba Holsa, Taz ezekuta husi kompañia Hugu Amor Unip Lda ho kustu $239,963 no daudaun ne’e ninia progresu fíziku atinje ona 41%. Enkuantu projetu PDIM 13 ne’e daudaun ne’e atinje ona 67,11%.
Enkuantu husi totál projetu ne’e sei iha orsamentu poupansa nune’e Autoridade Munisípiu Bobonaro deside implementa tán projetu tolu.
Projetu ne’e ida mak konstrusaun rezidénsia pesoál saúde no reablitasaun postu saúde Cova, Balibó ezekuta husi kompañia Alju Unip Lda ho kustu $27,678,60, daudaun ne’e atinje ona 13%, reablitasaun uma maternidade no aumenta sala-tolu iha Atabae ezekuta husi Kompañia Sigo Unip Lda ho kustu $19,914.12, dadaun ne’e ninia progresu fíziku atinje ona 15%.
Nune’e mós projetu ida fali Konstrusaun jardín no Paving Block iha Edifísiu Autoridade Munisípiu Bobonaro ezekuta husi Kompañia CLH Junino Unip Lda ho kustu $8,937.82 ne’ebé ninia progresu fíziku atinje ona 27% no sei iha posiblidade halo reabilitasaun ba tribuna ka fatin serimónia iha kampu Futeból Maliana.
Notisia relevante: EUA kompromete inklui Bobonaro iha programa nutrisaun – edukasaun
Jornalista: Sérgio da Cruz
Editór: Evaristo Soares Martins
