COVALIMA, 14 Outubru 2024 (TATOLI) – Ema deskoñesidu tuda rahun vidru karreta operasaun Eletrisidade Timor-Leste, Empreza Públika (EDTL, E.P) Covalima nian, iha aldeia Foho-Rua, suku Ogues, postu administrativu Maucatar.
Xefe Unidade EDTL Covalima, Anorito Mendonça, relata katak ema deskoñesidu tuda karreta EDTL bainhira tékniku sira ne’ebé pikete bá hadi’a eletrisidade iha parte Ogues ne’ebé avaria iha tuku 24h10, iha loron 14.
“Sira fila mak hetan tuda, nune’e karreta operasaun ho marka Hilux ho nia xapa matríkula G 05994 nia vidru rua rahun”, Anorito Mendonça informa, ohin.
Hafoin akontese insidente ne’e, xefe EDTL lori kedas veíkulu ne’e bá iha Komandu Polísia Nasionál Timor-Leste (PNTL) atu buka tuir suspeitu ne’ebé tuda rahun vidru, nune’e bele reponsabiliza nia hahalok.
EDTL hato’o ona keixa ba iha PNTL, nune’e hein de’it rezultadu investigasaun husi komandu atu halo prosesu tuir dalan legál. Karreta ne’ebe entrega ba Polísia ne’e EDTL foti ona no daudaun para iha edifísiu.
Komandante PNTL Covalima, Superintendente Polísia Calisto Gonzaga, konfirma katak komandu simu ona informasaun kona-ba ema deskoñesidu tuda rahun karreta EDTL nian bainhira hala’o serbisu iha tempu kalan. “Ita rejista ona kazu ne’e bainhira funsionáriu EDTL presta sira-nia serbisu iha tempu kalan”, nia reitera.
Komandu PNTL orienta kedas ekipa investigasaun bá terrenu atu kompleta prosesu, nune’e buka tuir ema deskoñesidu ne’e.
Notísia relevante: EDTL seidauk normaliza forñesimentu eletrisidade iha suku Zulo Zumalai
Jornalista: Celestina Teles
Editora: Maria Auxiliadora
