TIC Timor fahe informasaun kona-ba aplikasaun e-servisu iha Covalima
COVALIMA, 15 Outubru 2024 (TATOLI) – Ajénsia Teknolojia Informasaun no Komunikasaun, Institutu Públiku (TIC Timor, I.P) divulga informasaun kona-ba aplikasaun haat servisu eletróniku ba autoridade sira iha Covalima.
Aplikasaun sira ne’e mak Cloud Governu www.cloud.gov.tl mak plataforma kolaborasaun Governu, funsiona hanesan solusaun cloud nian hodi rai no fahe dokumentu liuhusi online ho seguru; e-Mail mak servisu korreiu eletróniku Governu ne’ebé fasilita komunikasaun entre entidade Governu no públiku sira ba asuntu ofisiál sira; Ofísiu – sistema jestaun rejistu dokumentu eletróniku no nia funsaun atu jere karta ofisiál sira ne’ebé tama no sai ho mekanizmu despaxu nian ne’ebé iha atu otimiza no ezekuta servisu nesesáriu sira ho efetivu no efisiente.
Aplikasaun ikus mak HMRS – Sistema Jestaun Rekursu Umanu ne’ebé hanesan software konjunta hodi jere rekursu umanu sira ho nia prosesu relasionadu tomak iha instituisaun internu, liuhusi karakterístika sira hanesan avalisaun dezempeñu, oráriu analítiku no pedidu servisu nian.
“Sensibilizasaun ne’e hanesan parte-ida ami hakarak fahe koñesimentu ba funsionáriu oinsá sira utiliza kona-ba sistema dijitalizasaun iha instituisaun sira”, reprezentante Diretór-Ezekutivu TIC Timor, Rusmin de Fatima Vicente, dehan ohin.
Nia salienta katak atividade divulgasaun informasaun kona-ba sistema dijitál TIC Timor halo iha munisípiu ualu ona, falta Viqueque, Bobonaro no Baucau.
Iha sorin seluk, reprezentante Prezidente Autoridade Covalima, Caetano Ribeiro, afirma katak atividade sensibiliza sistema dijitál ne’e importante hodi tulun serbisu iha parte administrasaun nian.
“Aplikasaun dijitál parte-ida atu fasilita ita-nia serbisu iha nasionál tanba uza ona sistema referidu, maibé iha munisípiu mak sosializa informasaun nune’e sistema atendimentu labele uza ona manuál”, nia dehan.
Autoridade ne’e husu funsionáriu sira atu partisipa másima hodi rona informasaun kona-ba uza sistema e-servisu no la presiza imprime ona dokumentu importante sira tanba manda de’it ona iha fatin.
TIC Timor nu’udar ajénsia Governu nian ne’ebé ezerse nia funsaun haktuir Dekretu-lei númeru 29/2017 hodi jere infraestrutura, prestasaun servisu eletróniku sira no implementa polítika teknolojia informasaun no komunikasaun ho dezenvolvimentu aplikasaun servisu Governu eletróniku iha Timor-Leste.
Notísia relevante: TIC Timor sensibiliza sistema dijitalizasaun no Governu eletróniku iha Oé-Cusse
Jornalista: Celestina Teles
Editora: Maria Auxiliadora
