OÉ-CUSSE, 10 Outubru 2024 (TATOLI) – Ajénsia Teknolojia Informasaun no Komunikasaun, Institutu Públiku (TIC Timor, I.P), halo divulgasaun kona-ba sistema dijitalizasaun no Governu eletróniku ba funsionáriu sira iha Rejiaun Administrativa Espesiál Oé-Cusse Ambeno (RAEOA).
Diretór-Ezekutivu Interinu TIC Timor, Justo Fernandes, dehan atividade ida ne’e la’ós realiza ba dahuluk iha RAEOA, maibé ba daualuk ona, hafoin konklui iha munisípiu seluk atu hasa’e koñesimentu no abilidade líder lokál no funsionáriu sira iha área dijitalizasaun no Governu elétroniku.
“Objetivu prinsipál husi sensibilizasaun ne’e atu fanu funsionáriu públiku sira no ajente sira katak Governu iha planu implementa Governu elétronika iha tinan oin mai”, nia dehan iha salaun administrasaun Numbei.
Notísia relevante: TIC Timor asina nota apoiu CNE iha área dijitalizasaun sistema
Tanba ne’e, molok tama ba iha implementasaun, presiza iha koñesimentu kle’an kona-ba Governu eletróniku, tanba liga ba iha programa Ezekutivu nian iha númeru 2.8 ne’ebé ko’alia kona-ba teknolojia informasaun no komunikasaun no númeru 6.7 ko’alia kona-ba Governu elétroniku.
“Entaun, ida-ne’e ita ko’alia mós kona-ba infraestrutura rede nian, ne’ebé sai nu’udar asuntu prinsipál iha implementasaun Governu eletróniku molok ita tama ba iha sistema Governu elétroniku. Ne’ebé ha’u hanoin ne’e importante tebes tanba sei komesa iha 2025”, nia hateten.
Atuál Diretór Dezenvolvimentu Sistema Aplikasaun ne’e salienta katak durante sensibilizasaun ba matéria prinsipál sira foku liu ba iha outlook ka e–mail ofisiál nian atu uza nu’udar komunikasaun interna entre instituisaun no esterna no hasa’e koñesimentu ba iha utilizasaun microsoft word no excel.
“Ha’u hanoin ida-ne’e prinsipál tebes sai nu’udar faze dahuluk atu ita fó kapasitasaun ba iha funsionáriu sira. Agora, hela munsípiu Covalima, Bobonaro, Baucau, Viqueque no ikusliu sei enserra iha Ataúro”, informa.
Notísia relevante: TIC Timor planeia kria aplikasaun online trata karta kondusaun no kir
Iha fatin hanesan, Sekretáriu Rejionál ba Asuntu Administrasaun, André Lao, reprezenta Prezidente Autoridade RAEOA, Rogério Lobato, agradese ba TIC Timor tanba liuhusi sensibilizasaun ne’e bele hasa’e koñesimentu ba servidór Estadu sira iha Oé-Cusse.
“Ne’e faz parte ba ita-nia serbisu loroloron nu’udar funsionáriu, tanba ne’e ha’u husu ba ita hotu atu uza tempu ne’e didi’ak hatudu pontualidade no dixiplina durante loron ida ne’e, nune’e imi bele hetan buat foun ruma husi programa ne’e”, nia sujere.
Notísia relevante: TIC Timor asina nota apoiu CNE iha área dijitalizasaun sistema
Jornalista: Abílio Elo Nini
Editora: Maria Auxiliadora
