COVALIMA, 16 Outubru 2024 (TATOLI) – Autoridade postu administrativu Maucatar no Ofisiál Polísia Suku (OPS) Ogues promete buka tuir autór ne’ebé tuda rahun vidru karreta Eletrisidade Timor-Leste, Empreza Públika (EDTL, E.P).
“Ha’u atu buka tuir autór ne’ebé tuda rahun vidru karreta EDTL, E.P liuhusi mekanizmu orienta ba xefe suku atu fó avizu ba komunidade kada aldeia sira ne’ebé pertense ba suku Ogues, postu Maucatar, munisípiu Covalima, nune’e autór bele responsabiliza nia atu tuir lei”, administradór postu Maucatar, Laurentino de Jesus, dehan iha ámbitu diálogu ho parte EDTL iha Ogues.
Diálogu ne’e realiza bainhira EDTL Covalima hamate provizoriamente ahi ba suku Ogues durante kalan rua no loron tolu relasiona ho ema deskoñesidu tuda rahun vidru karreta EDTL ho marka Hilux, iha aldeia Foho-Rua, iha loron 14 Outubru, pur volta tuku 12h10, bainhira tékniku sira bá hadi’a eletrisidade.
Rezultadu husi diálogu entre autoridade postu Maucatar ho EDTL iha ona solusaun, tanba EDTL mós promete atu halakan fali ahi.
Xefe unidade EDTL, E.P Covalima, Anorito Mendonça, rekoñese dezliga tiha ahi ba komunidade suku Ogues, nune’e bele buka solusaun hodi buka autór ne’ebé tuda rahun karreta bainhira tékniku sira hala’o hela serbisu iha tempu kalan.
“Ami halo diálogu bainhira administradór Maucatar Laurentino de Jesus bá iha edifísiu EDTL Covalima hodi halo konfirmasaun kona-ba ami hamate provizoriamente ahi ba suku Ogues”, nia relata.
Notísia relevante: Ema deskoñesidu tuda rahun vidru karreta EDTL Covalima
Jornalista: Celestina Teles
Editora Maria Auxiliadora
