AINARO, 16 outubru 2024 (TATOLI)— Prezidente Repúblika (PR), José Ramos Horta, hakarak inisia Festivál Kulturál Rabilau sai eventu boot iha Timor-Leste.
“Rabilau bele sai Festivál boot iha Timor-Leste kada tinan ema atu ba atus no rihun ba rihun bele mai, desde mai buat ne’ebé ha’u hateten labele dada grupu modernu sira maka mai toka fali, maibé 100% tenke toka ho grupu tradisionál hanesan dansa koremetan no dansa tradisionál sira seluk ne’ebé iha,” PR Horta hateten iha Festivál Kulturál Rabilau, iha foho Rabilau, postu administrativu Maubise, munisípiu Ainaro, kuarta ne’e.
Notísia relevante : Grupu negósiu 87 harame feira Festivál Rabilau aprezenta produtu lokál
Xefe Estadu rekoñese inisiativa ne’e hahú ona desde tinan kotuk husi Autoridade suku Maubisse sira ho sira nia rekursu rasik.
“Tinan kotuk ha’u mai, iha momentu ne’ebá ha’u mai sosa karau ida ba sira. Momentu ne’ebá infraestrutura balun iha no balun menus loos, nune’e Prezidente fó apoiu balun tan no ko’alia ho Primeiru-Ministru no Vise Primeiru-Ministru, nune’e envolve Governu hodi hadi’a di’ak liu iha futuru,” Xefe Estadu haktuir.
PR konsidera presiza ministériu responsável nia envolvimentu iha eventu ne’e hodi bele promove kultura Timor nune’e labele lori fali kultura modernu.
“Reprezenta tradisionál duni, la’ós lori fali grupu modernu sira, di’ak liu halo de’it iha Dili tanba Maubisse ne’e sai hanesan illa kulturál ba munisípiu hotu hodi halo buat ne’ebé orijinál no 100% tradisionál kulturál. Rabilau maka sai Festivál Kulturál Timor nian iha futuru,” nia tenik.
Jornalista : Osória Marques
Editora : Julia Chatarina
