BOBONARO, 16 outubru 2024 (TATOLI)-Servisu Saúde Munisípiu Bobonaro no Sentru Saúde Komunitária Kakanea suporta husi parseiru Word Vizion Timor-Leste, kuarta ne’e implementa atividade pakote integradu saúde hodi halo tratamentu saúde masál ba komunidade aldeia Purugua, suku Ilat-laun, postu administrativu Bobonaro.
Xefe sentru Saúde Komunitária Kakanea, Agapito Bere Sae, informa, iha atividade Pakote Integradu Saúde ne’e realiza programa konsulta jerál, konsulta inan isin-rua, konsulta inan fó susu, tetu labarik, fahe super-seriál, vasina rútina no vasina DT ba estudante sira no vasina COVID-19 ba komunidade ne’ebé seidauk kompleta doze.
Liuhusi atividade ekipa saúde konsege fó atendimentu ba komunidade 195, husi númeru ne’e konsulta jerál na’in-110, ANC na’in-sia, vasina rútina 22, vasina Covid-19 na’in-11, konsulta inan fó susu sia, konsulta inan isin-rua ualu no labarik no vasina labarik tinan ida to’o lima na’in-26.
Responsável SSK Kakanea, esplika, pasiente sira-ne’e maioria iha aldeia Purugua, maibé balu mós mai husi suku viziñu sira hanesan Atudara, postu administrativu Cailaco no balu mai husi suku Obulo, postu administrativu Atsabe, munisípiu Ermera.
Notísia relevante: INFP responde ona ai-moruk bá Saúde Bobonaro
“Objetivu ami mai iha fatin ida ne’e, tanba sira dook husi fasilidade saúde, ne’e mak ami hakbesik atendimentu mai iha komunidade sira-ne’ebé hela iha área remota, tanba udan ami atu mai iha ne’e susar oituan,”Nñ nia informa ba Jornalista sira ih Ensinu Báziku Filiál Rai-Klaran.
Biban ne’e Xefe SSK Kakanea mós apela ba komunidade aldeia Purugua katak, kuandu moras maka’as tenke komunika ho grupu suporta inan ho líder komunitária nune’e bele apoia no fasilita transporta ba fasilidade hodi hetan tratamentu.
“Lalika rona boatu, liuliu ba matan dook sira, di’akkiu ba fasilidade, iha-ne’ebá mak hatene klaru, saida maka moras iha ita nia-laran ne’e, 3ma leno ba haree, bele fiar ita-nia kultura, ami la bandu, maibé moras labele budu to’o hanesan has-tasak ona mak imi lori ba,” nia fó hanoin.
Xefe suku Ilat-Laun, Adelino Mai Bere, agradese ba ekipa saúde no parseiru Word Vision ne’ebé konsege halo atendimentu direita iha aldeia Purugua.
“Distánsia husi aldeia ne’e ba postu saúde dook loos, entaun komunidade sira moras ruma labele ba konsulta liu-liu tempu udan, entaun ita-nia ekipa sira ohin mai ne’e bele ajuda ona inan-aman no labarik sira ne’ebé moras durante ne’e,” nia katak.
Tuir planu atividade ne’e sei implementa iha aldeia Bour, suku Kolimau, postu administrativu Bobonaro, munisípiu Bobonaro ne’ebé baliza ho munisípiu Ainaro.
Notisia relevante: Diretór Saúde Bobonaro la tolera pesoál saúde abandona serbisu
Jornalista: Sérgio da Cruz
Editór: Evaristo Soares Martins
