BALIBO, 16 outubru 2024 (TATOLI) –Primeiru-ministru Kay Rala Xanana Gusmão no Prezidente Repúblika (PR), José Ramos Horta kongratula jornalista sira husi instituisaun media públiku no privada sira, iha ámbitu komemorasan loron nasionál ba imprensa daruak ho tema ‘Atmosfera liberdade imprensa iha nasaun demokrátiku’, ne’ebé organiza husi Konsellu Imprensa (CI, sigla portugés) iha postu Administrativu Balibo, munisípiu Bobonaro, ohin.
“Parabéns ba imi, avansa nafatin mas hadi’a imi-nia kbiit nafatin. Hakuak boot ho domin,” Xefe Ezekutivu ne’e hato’o liuhusi vídeo-gravadu, ne’ebé mak CI loke perante jornalista sira, autoridade governativa, no komunidade sira, iha Balibo, kalan ne’e.
Líder nasionál no karismátiku ne’e dehan, Iha Estadu Demokrátiku iha ne’ebé de’it imprensa sai fatór importante ida ba demokrasia, ba direitu umanu no mós ba estabilidade, pás no seguransa.
“Loos duni, ba jornalista sira autór ba buat sira ne’ebé temi. Agora daudaun iha mundu fake news, buat oioin, sosiál media estraga buat hotu. Ne’e duni, Timor-Leste, husi imprensa, jornalista sira buka valór sira di’ak atu defende; Liberdade imprensa, nosaun Estadu, demokrasia, valór universal direitu umanu; buat sira ne’e hotu”.
Nia mós husu ba jornalista sira hotu katak produtu jornalístiku sira tenke investiga uluk mak foin públika. Investiga uluk mak foin hakerek. Labele tuir de’it, buat ruma mosu mai, ita kaer soe tuun, soe sa’e, ne’e la’ós imprensa, ne’e sosiál media.
“Lalika ta’uk atu krítika! Mas, tenke iha fundamentu tanba demokrasia hanesan ne’e duni. Nia fundamentu loloos tanba ne’e tenke investiga uluk tanba investigasaun fó ona baze ba ita para halo krítika, tenkeser! Para nune’e, hodi defende Estadu Direitu demokrátiku,” Xanana fó hanoin.
Notísia relevante:Xanana: ”Jornalista esforsu aan nafatin halo análize kritika-iha kapasidade atu investiga”
Liuhusi meiu ne’ebé hanesan, PR José Ramos Horta mós hato’o nia kongratulasaun. “I6 outubru 2024 loron nasionál Liberdade imprensa, ha’u hahú ho parabéns ba jornalista hothotu – jornalista televizaun, rádiu, print (imprime) media, media sosiál, media online, ba imi hohotu ne’ebé ho imi-nia kakutak, imi-nia fuan, imi-nia profesionalizmu no imi-nia integridade maske enfrenta difikuldade hothotu, imi fahe informasaun ba povu tomak”.
Xefe Estadu hateten mós katak Informasaun importante tebtebes ba povu nia moris tanba informasaun ajuda ita hametin liután ita kona-ba demokrasia. Hateten demokrasia oinsá? Ho informasaun ita bele iha opiniaun, ita bele halo presaun ba ukun-na’in sira para bele halo governasaun di’ak liu, para bele halo povu nia moris di’ak liu para hamate problema boot iha rai-laran, ki’ak sira nian.
“Ha’u hatene que Liberdade imprensa iha Timor, rekoñesidu iha mundu. Ida-ne’e tanba atitude povu nian, atitude polítiku siru nian, governu nian. La iha ema ida buka halo presaun ba Liberdade imprensa, ba jornalista sira”.
“Maibé, liliu Liberdade imprensa ne’e ba imi rasik jornalista sira, ho imi-nia korajen, sosiedade sívil ne’ebé defende Liberdade imprensa, ba institusoens privadu hotu hanesan universidade sira, ba igreja, ita hothotu hamutuk mak hetan rezultadu ida, iha Timor rai ida moris iha Liberdade imprensa, Liberdade iha media. Ba jornalista sira, parabéns dala ida tan ba imi hothotu,” nia konklui.
Entretantu, loron nasionál Liberdade imprensa Parlamentu Nasionál (PN), aprova liuhusi projetu rezolusaun PN nú. 95/V (4a), iha loron 24 maiu 2022, nune’e iha loron 16 kada tinan bele selebra.
Notísia relevante:PR Horta husu jornalista timoroan nafatin servisu ho profisionál
Tatoli
