DILI, 05 setembru 2024 (TATOLI)-Primeiru-Ministru, Kay Rala Xanana Gusmão, hateten mída ka jornalista tenke esforsu-aan nafain hodi halo análize kritiku ba informasaun no iha kapasidade atu investiga.
“Imi (jornalista) esforsu aan nafatin hodi halo análize kritika. Mídia la’ós de’it fó informasaun maibé tenke iha kapasidade investiga hodi haree ba mundu, haree ba ita-nia rain hodi eduka,” Prmeiru-Ministru, Kay Rala Xanana Gusmão, hateten ba jornalista sira iha serimónia agradesimentu no atribusaun entrega sertifikadu apresiasaun ba instituisaun órgaun komunikasaun sosiál nasionál no internasionál ne’ebé hala’o kobertura ba vizita Sua Santidade Papa Francisco mai Timor-Leste durante loron 09-11 setembru 2024, iha salaun Larigutu Komisaun Nasionál Eeleisaun (CNE, sigla portugés), Caicoli, sábadu ne’e.
Tanba, Xefe Governu ne’e hateten, iha prosesu konstrusaun Estadu ne’e mídia ka jornalista dezempeña papel importante hodi fó informasaun no eduka sidadaun sira atu hadi’a sira-nia komportamentu.
“Iha prosesu konstrusaun Esradu, mídia dezempeña papél importante hodi la’ós de’it fó informasaun maibé tenke fó mós hanoin ba sidadun sira atu hadi’a komportamentu,” PM Xanana Gusmao hateten.
Tuir nia, iha vizita Sua Santidade Papa Fransisco iha Timor-Leste ne’e jornalista sira serbisu makas hodi fó informasaun ba publiku no sente kontente, tanba jornalsita sira desempeña duni misaun sira -ne’e hodi hatudu apovu tomak no ba ema hotu kona-ba vizita Santu Padre iha Timor-Leste la’o ho di’ak.
Nia esplika, ho Timor-Leste nia kontribuisaun no serbisu diak mak Papa Francisco nafatin temi Timor-Leste nia naran ba mundu ne’e, tanba jornalista sira husi RTTL, Timor Post, GMN, Tatoli no mídia sira seluk ne’ebé halo ona kobertura sira-ne’e la’o ho di’ak.
PM Xanana konsidera, problema boot iha mundu mak notísia falsa sira iha mídia, nune’e husu ba jornalsita sira loke hanoin ba mundu hodi bele deznevolve imi-nia aan iha área saida de’it atu nunee bele dezenvolve Timor-Leste ba oin ho di’ak.
Iha fatin hanesan, Sekretariu Estadu Komunikasaun Soosiál, Expedito Dias Ximenes, hateten mídia mak sai matan no tilun ba povu, tanba ne’e tenke hatene papel mídia iha orgaun komunikasuan sosiál iha prosesu kontrusaun Estadu nian.
“Ha’u hanoin ita-nia programa Meet the Press ba fulan-outuru nian ho prezensa Primeiru-Ministru, Ministru Defeza no Seguransa no Ministru Investimentu no Estartéjiku inklui entidade sira hotu iha ne’e, ha’u hein katak kooperasaun ne’ebé mak di’ak tebes entre empreza no Governu Kosntituisionál da-sia no setor privadu ne’ebé durante apoiu mídia sira hodi hala’o knaar hanesan Timor Telekom,Telemor no Telekomsel ne’ebé mak oferese liña internet ba operadór sira hotu,” nia dehan.
Serimónia atribuisaun sertifikadu apresiasaun husi Governu Konstituisionál da-sia ba mídia hamutuk 38 mak hanesan Rádiu Televizaun Timor-Leste, Empreza Públiku (RTTL, E.P), Agência Notisioza Timor-Leste-TATOLI, Institutu Públiku (TATOLI, I.P), Grupu Media Nasional (GMN), Suara Timor Lorosae (STL), Diario Timor Post, Jornál Independente, Diligente, Guardamor TV, Dili Post, Hatutan.Com, Video Information Provider (VIP TV).
Media one Timor, Sapnews, Lafaek News, Mídia Lalenok Ba Ema Hotu (LABEH TV), MFtv, Smnews, TVet, Mídia Mudansa, Orluli News, Loluwari. Media Arquideozese Metropolitana Dili, Sentru Audivisual Max Stall, Arquivu Museum da Resisténcia Timorense, Casa de Produsaun Auduvisual.
Parseiru mídia hanesan TIC Timor, Telekomsel, Timor Telecom, Telemor no Diresaun Nasional da Infraestrutura Komunikasaun.
Ajensia internasionál sira mak hanesan European Press Photo Ajensi (EPA), Agence France-Press Reuters, Kyodo News, NHk Japaun Asosiated Press, ABC News Australia no Monjo Video Works.
Jornalista : Felicidade Ximenes
Editór : Cancio Ximenes
