COVALIMA, 22 Outubru 2024 (TATOLI) – Funsionáriu sira iha Covalima prátika oinsá utiliza sistema aplikasaun e-servisu ne’ebé Ajénsia Teknolojia Informasaun no Komunikasaun, Institutu Públiku (TIC Timor, I.P) partilla hela ba sira, liuliu ba sistema ofísiu, jestaun rekursu umanu no aplikasaun servisu cloud Governu.
Xefe Departamentu Formasaun no Jestasaun Sistema Informasaun, Norberto Soares Cristovão, hateten atividade prátika ne’e halo tanba TIC Timor divulga, foin lalais, informasaun sira kona-ba e-servisu.
“Ita mai ho planu bazeia ba autoridade ne’ebé submete karta ba TIC Timor hodi implementa sistema dijitál ho uza aplikasaun hodi fasilita funsionáriu sira hala’o serbisu iha idaidak nia instituisaun”, Norberto Cristovão dehan iha salaun AMC, ohin.
Nia esplika katak uza sistema aplikasaun dijitál ho intensaun atu garante serbisu atendimentu ho efisénsia no efetivu ho sistema Governu eletróniku, liuhusi meiu dijitál ba funsionáriu ne’ebé mai husi servisu munisipál sira.
Aplikasaun sistema dijitál tolu mak hanesan sistema ofísiu halo jestaun rejistu dokumentu eletróniku. Nia funsaun atu jere karta ofisiál sira ne’ebé tama no sai ho mekanizmu despaxu ne’ebé iha atu optimiza no ezekuta servisu nesesáriu sira ho efetivu no efisiente.
Seluk mak Sistema Jestaun Rekursu Umanu hanesan aplikasaun software konjunta hodi jere rekursu umanu sira ho nia prosesu relasionadu tomak iha instituisaun nia laran, liuhusi karakterístika sira hanesan avaliasaun dezempeñu, oráriu analítiku no pedidu serbisu nian.
Aleinde ne’e, aplikasaun servisu cloud Governu ka cloud.gov.tl mak plataforma kolaborasaun Governu ne’ebé funsiona hanesan solusaun cloud hodi rai no fahe dokumentu ho seguru liuhusi online.
Funsionáriu Marcos Gusmão reforsa katak presiza duni iha koñesementu kona-ba uzu aplikasaun sistema ho dijitál iha serbisu administrasaun, nune’e bele redús kustu atu sosa suratahan no seluk tan.
“Iha administrasaun, ita uza sistema dijitál ne’e di’ak liu hodi fasilita ita halo serbisu, nune’e bele garante serbisu efetivu no efisiente tanba ita la presiza ona gasta osan atu sosa suratahan no gasta tempu atu entrega karta bá-mai”, nia realsa.
Notísia relevante: TIC Timor fahe informasaun kona-ba aplikasaun e-servisu iha Covalima
Jornalista: Celestina Teles
Editora: Maria Auxiliadora
