DILI, 24 outubru 2024 (TATOLI)—Primeiru-ministru (PM), Kay Rala Xanana Gusmão lansa programa formasaun, sertifikasaun no lisensiamentu bá ekipamentu altu risku, iha Lecidere, kinta lorokraik ne’e.
Programa ne’e realiza tanba Institutu Jestaun Ekipamentu no Apoiu bá Dezenvolvimentu Infrastrutura, Institutu Publiku (IGEADI.IP) estabelese kooperasaun ho kompañia licensing.tl, ISAT no IS Austrália hodi fornese formasaun altu nível kumpri padraun internasionál no indústria globál.
Primeiru-Ministru louva inisiativa ne’e tanba servisu la’ós de’it tuur iha komputadór oin, maibé bele servisu iha kualkér área ne’ebé konsidera bele hodi partisipa iha dezenvolvimentu nasaun nian.
“Ita iha hela dalan bá dezenvolvimentu. Maski seidauk bele halo buat hotu-hotu, ikus-mai ita sei enfrenta nesesidade barak tebtebes. Parabéns bá Ministériu Obras Públikas, IGEADI no kompañia licensing.tl. Parabéns mós bá F-FDTL ne’ebé envolve mós iha programa ne’e,” PM Xanana hateten iha nia intervensaun.
Xefe Governu fó hanoin katak, nasaun iha militár la’ós atu halo funu maibé atu ajuda populasaun. Ne’e duni, programa ne’e di’ak tanba bele kapasita membru F-FDTL sira hodi apoia povu. Husu mós katak bainhira mosu situasaun emerjénsia F-FDTL rai hela kilat iha kuartél Jenerál hodi tuun bá ajuda povu bainhira hasoru inundasaun.
Iha fatin hanesan, Prezidente Konsellu Administrasaun IGEADI, I.P, Ana Paula da Cruz ho esperansa katak lansamentu ida-ne’e marka duni inísiu hosi inisiativa ida-ne’ebé sei lori impaktu boot no kle’an bá Timor-Leste nia sustentabilidade dezenvolvimentu sosiál, ekonomia nasionál no futuru Timor-Leste nia partisipasaun iha progresu dezenvolvimentu internasionál.
“Bainhira hahú hakat ba oin iha jornada importante ida-ne’e, ita mós rekoñese ho di’ak katak, programa formasaun, sertifikasaun no lisensiamentu ida-ne’e, sei fó influénsia progresiva. Fiar katak programa ida-ne’e sei oferese importánsia signifikativu bá ita rain nia dezenvolvimentu infraestrutura,” nia hateten.
Programa ida-ne’e realiza ho klasifikasaun modu oin tolu ne’ebé kategorizadu hanesan formasaun, sertifikasaun no lisensiamentu.
Programa ida-ne’e realiza la’ós atu fó formasaun de’it bá individuál atu halo operasaun bá ekipamentu sira, maibé substánsia programa ne’e realiza atu hakbi’it no hametin TL nia forsa traballu no asegura mós katak TL nia operadór sira hetan sertifikadu ne’ebé aliña tuir konformidade padraun indústria globál.
Kompañia Licensing.tl, ISAT no IS Austrália iha ona esperiénsia tinan barak hala’o atividade iha área formasaun, sertifikasaun no lisensiamentu iha Timor-Leste no Austrália iha área indústria espesífika sira hanesan área industria sívil no área indústria rekursu enerjia bá atividade petroléu, gás no minerál.
Kompania ne’e mós estabelese ona sira-nia baze eskritóriu no atividade iha Timor-Leste dezde tinan-2010.
Iha lansamentu ne’e funsionáriu IGEADI, I.P ho membru F-FDTL halo mós simulasaun bá operasaun ekipamentu pezadu sira.
Partisipa iha eventu ne’e mak hanesan Xefe Estadu Maiór Jenerál F-FDTL, Tenente Jenerál Falur Rate Laek, Embaixadór Japaun iha Timor-Leste, Tetsuya Kimura, membru Governu, parseiru dezenvolvimentu sira no membru Polísia Nasionál Timor-Leste (PNTL).
Jornalista: Hortencio Sanchez
Editór: Rafael Ximenes de A. Belo
