OÉ-CUSSE, 28 outubru 2024 (TATOLI) – Komisaun Funsaun Públika (KFP) akompaña hosi Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, segunda ohin, fó tomada pose ba empasadu na’in-159 mai husi instutuisaun públiku sira iha Oé-Cusse.
Komisaun KFP, Portefoliu Forsa Traballu, José Telo Soares Cristovão, agradese ba emposadu 159, ne’ebé simu ona kargu la’ós oportunidade maibé presiza kumpre nafatin lei funsaun públika nian.
“Pose ohin ne’e atu hatudu ba públiku katak, imi hahú hala’o kna’ar tuir estrutura iha daudaun, maibé ho seremónia pose ne’e Komisaun Funsaun Públika ejize komunga nafatin lei funsaun públika, no husu ba autoridade RAEOA, nafatin konfia estrututura orgnika atu legaliza kargu ne’ebé eziste,” Komisáriu KFP ne’e, relata iha diskursu, ne’ebé hala’o iha Otél Ambeno.
Notísia relevante:KFP rejista funsionáriu públiku-ajente administrativu idade 65 hamutuk 2.235
Iha biban ne’e, Komisáriu KFP ne’e, fó hanoin ba dirijenti sira atu hatudu nafatin dixiplina no pontualidade servisu no hatudu integridade iha instituisaun Estadu.
“Ohin imi jura ba rai ida-ne’e, sei la servi ba kór partidu A ka B. Ha’u hanoin tendénsia Oé-Cusse Komisaun Funsaun Públika nafatin ezije ba imi hotu, aposta konfidénsialidade, ita-nia pontualidade servisu, imparsialidade, responsabilidade, integridade, onestidade salva-guarda segredu ne’ebé iha,” nia apela.
Prezidente Autoridade RAEOA, Rogério Tiago Lobato, hateten, iha seremónia pose jura ne’e perante emposadu sira, atu servi no lealdade ba Estadu no Governu. Tan ne’e orgullu tanba ho kargu foun sira foin simu pose sei haforsa liután mákina Estadu ba oin.
“Tanba Estadu mak ita hotu, tan ne’e mákina Estadu ita tenki hala’o ba oin, servisu Estadu labele para, tanba ita funsionáriu ba Estadu, entaun tenki leál ba funsaun públika no Estadu, labele leál ba partidu. Ha’u husu ba família atu apoia sira, kuandu uma-laran metin sira mós servisu metin, kuandu iha mane ida matenek servisu metin ba rai ne’e feto ida sempre iha nia kotuk, hanesan mós ho feto sira kuandu servisu metin mane sempre iha kotuk,” nia apela.
Notísia relevante:KFP prioriza reforma administrasaun públika-halo rekrutamentu funsionáriu foun iha 2025
Entretantu, dirijente foun 159 kompostu husi feto na’in-30 no mane 129, no husi Diretór ba Diresaun sira hamutuk 16, Xefe Departamentu 37, Xefe Seksaun sia, Prezidente Konsellu Administrsaun ida, Diretór Eskola 13, Adjuntu Diretór 13 no koordenadór Eskola 61.
Jornalista: Abílio Elo Nini
Editór: Rafael Ximenes de A. Belo
