DILI, 25 outubru (TATOLI)—Komisaun Funsaun Públika (KFP) prevee $2,901,148 iha proposta Orsamentu Jerál Estadu (OJE) 2025, hodi kontinua prioriza programa reforma rekursu umanu administrasaun públika no halo rekrutamentu ba funsionáriu foun ho programa sira seluk ne’ebé sei implementa iha tinan 2025.
Notísia Relevante: PN aprova proposta-lei reforma obrigatóriu ba FP ho idade 65
Prezidente Komisaun Funsaun Públika (KFP), Agostinho Letêncio de Deus, hateten ohin halo audénsia públika ho komisaun A trata asuntu Justisa no Konstituisionál iha Parlamentu Nasionál (PN) hodi aprezenta progresu ezekusaun OJE 2024 no aprezenta planu proposta OJE 2025.
Aleinde ne’e, KFP relata nia ezekusaun orsamentu ba 2024 inklui komitmentu atinje ona 75% no hein katak to’o dezembru bele atinje to’o 90%.
“Ita iha prioridade lubun ida-ne’ebé ita bolu planu reforma rekursu umanu administrasaun públika ne’ebé konklui iha komponente 18. Husi komponente sira-ne’e, balun ita hahú tiha ona iha 2024. Ezemplu, foin daudaun ita iha ona lei autorizasaun ba idade limite ba reforma nian, promosaun por antiguidade, entaun prioridade sira-ne’e ita sei kontinua ba iha 2025, exemplu ida mak ita sei ko’alia kona-ba prosesu rekrutamentu ba funsionáriu foun iha 2025, tan. Ezempl iha tinan hanesan sei iha mós reforma obrigatóriu,” Prezidente KFP ne’e hateten hafoin ramata audiénsia iha sala konferénsia PN, sesta ne’e.
KFP fó prioridadeseluk mak haree kona-ba sistema kareira funsionáriu públiku ba promosaun, kapasitasaun rekursu umanu, entaun hanoin atu aprezenta fali no reajustamentu sistema sira iha tinan oin.
Nune’e, planu reforma ne’ebé mak aprezenta ona iha Konsellu Ministru (KM) iha 2024, ida-ne’e mak hahú implementa iha tinan oin
Entretantu, tuir dokumentu livru proposta OJE 2025 Planu Asaun Annual ba Entidade Públiku Setór Administrativu ba tinan oin, KFP prevee $2,901,148 hodi aloka ba saláriu vensimentu $1,992,798, bens no serbisu $908,350.
Husi orsamentu ne’e hodi finannsia programa funsionamentu no dezenvolvimentu instituisionál ho sub-programa neen (6) no atividade 25.
Programa inkluzaun sosiál ho sub-programa ida (1) no atividade ida (1).
Notísia Relevante: KFP aprezenta ba KM kona-bá prespetiva reforma Funsaun Públiku
Jornalista : Nelson de Sousa
Editór : Cancio Ximenes
