OÉ-CUSSE, 29 outubru 2024 (TATOLI) – Prezidente Autoridade RAEOA, Rogério Tiago Lobato, sei inaugura projetu terminál Tono, nune’e bele fasilita ona transporte sira liuliu mikrolete, angguna sira.
Projetu terminál ne’e, lokaliza iha eis-merkadu Tono, aldeia Noeninen suku Cunha sub-rejiaun Pante Makasar, ne’ebé ezekuta husi kompaña Grand Enklave Unipesoál Lda.
“Ha’u sei rezolve no iha tempu-badak, tanba projetu ne’e mai husi administrasaun anteriór ita sei buka tempu atu inaugura,” Rogério Tiago Lobato, hato’o nia promesa iha terminál Tono, segunda horsehik.
Notísia relevante:Projetu terminál bá transporte públiku iha Tono atinje 97%
Rekorde katak, antes ne’e motorista mikrolete sira iha ezije ba Diresaun Nasionál Transporte Terrestre (DNTT) atu regula movimentu karreta angguna no tum-tum iha Oé-Cusse vila no ejize mós Prezidente Autoridade RAEOA atu halo ona inaugurasaun ba terminál Tono, tanba durante fatin propriu ba terminál nian iha Oé-Cusse seidauk ejiste.
Tanba ne’e tuir portavós motorista José Palat, hateten, durante ne’e, karreta angguna no tum-tum halo sirkulasaun la tuir regra, tanba okupa dalan mikrolete sira iha vila, nune’e afeta ba sira ladun hetan lukru kada loron.
Notísia relevante:Autoridade RAEOA xamada kompañia Grand Enclave ba projetu terminál Tono
Enkuantu projetu terminál Tono, kompañia Grand Enklave Unipesoál Lda mak ezekuta, hahú kedas iha 2022 ho valór kontratu hamutuk $226,017.38.
Orsamentu ne’e Autoridade RAEOA aloka husi Orsamentu Jerál Estadu (OJE) 2022 nian ho durasaun servisu fulan haat de’it maibé iha 2023 kompaña abandona no kontinua fali iha 2024 ne’e.
Jornalista: Abílio Elo Nini
Editór: Rafael Ximenes de A. Belo
