OÉ-CUSSE, 02 abríl 2024 (TATOLI) – Konstrusaun projetu terminál ba transporte públiku, ne’ebé Autoridade Rejiaun Administrativa Espesiál Oé-Cusse Ambeno (RAEOA) konstrui iha eis merkadu Tono daudaun ne’e nia progresu fizíku atinje ona 97%.
Projetu terminál ne’e, lokaliza iha eis merkadu Tono, aldeia Noeninen, suku Cunha, sub-rejiaun Pante Makasar, ezekuta hosi kompañia Grand Enclave, Unipesoál Lda.
Notísia relevante: RAEOA prevee rihun $226-resin ba terminál transporte públiku iha Tono
Nune’e, iha tersa ne’e, enjeñeiru hosi kompañia Grand Enclave, Unipesoál Lda, Domingos Bobo, koordena Diresaun Rejionál Infraestrutura (DRI), atubele entrega ona projetu ne’e ba Governu.
“Nia servisu tomak atinje ona 97%, ne’e maka ohin ha’u mai iha Diresaun Obra Públika, atu konfirma loloos, bainhira maka ami entrega ona projetu ne’e,” Domingos Bobo, ba jornalista sira iha Obra Públika Oé-Cusse.
Tékniku ne’e esplika, servisu fíziku maioria finaliza ona, hela de’it 3% tanba hela de’it serbisu kmaan balun.
Notísia relevante: Progresu fíziku projetu terminál ba transporte públiku iha Tono atinje pursentu 46
Entretantu, kona-bá asuntu ne’e, jornalista Agência Tatoli, konfirma Diretór Rejionál Infraestrutura (DRI), Remígio Nuno Sila, maibé lakohi ko’alia tanba okupadu ho servisu seluk.
Entretantu, projetu terminál Tono kompaña Gran Enclave Unipesoál Lda, hahú ezekuta iha 2022 ho orsamentu hamutuk $226,017.38.
Orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian ho durasaun servisu durante fulan-haat, maibé kompañia labele finaliza tuir kontratu ne’ebé iha, nune’e to’o abríl 2024 ne’e maka atinje 97%.
Notísia relevante: Autoridade RAEOA xamada kompañia Grand Enclave ba projetu terminál Tono
Jornalista: Abílio Elo Nini
Editór: Evaristo Soares Martins
